തളിപ്പറമ്പ്: മോഷണക്കേസ് പ്രതി തളിപ്പറമ്പ് പൊലിസ് സ്റ്റേഷനില്‍ ചില്ലുടച്ച് കൈയില്‍ സ്വയം മുറിവേല്‍പ്പിച്ചു. കുറുമാത്തൂര്‍ റഹ്മത്ത് മന്‍സിലിലെ റുവൈസിനെ(21) പരിയാരം മെഡിക്കല്‍ കോളജില്‍ പ്രവേശിപ്പിച്ചു. ബുധനാഴ്ച രാത്രി എട്ടരയോടെയാണ് സംഭവം. കെട്ടിടനിര്‍മാണവും മറ്റും നടക്കുന്ന സ്ഥലങ്ങളില്‍ മുന്‍സിപ്പല്‍ പഞ്ചായത്ത് എന്‍ജിനിയറെന്ന വ്യാജേന ഇതരസംസ്ഥാനതൊഴിലാളികളെ ഭീഷണിപ്പെടുത്തി മൊബൈല്‍ ഫോണും പഴ്‌സും തട്ടിയെടുക്കുകയാണ് റുവൈസിന്റെ രീതി. ശല്യം സഹിക്കാനാകാതെ കുറുമാത്തൂരില്‍ ബുധനാഴ്ച നാട്ടുകാരാണ് റുവൈസിനെ പിടികൂടി തളിപ്പറമ്പ് സ്റ്റേഷനില്‍ ഏല്‍പിച്ചത്. രാത്രി എട്ടരയോടെ മൂത്രമൊഴിക്കാന്‍ പോകണമെന്നാവശ്യപ്പെട്ട് ബഹളമാരംഭിച്ചതോടെ റുവൈസിനെ ലോക്കപ്പിന് പുറത്തിരുത്തി. ഇതിനിടെ ചായ ഗ്ലാസെടുത്ത് റുവൈസ് കൈയില്‍ മുറിവേല്‍പ്പിക്കുകയായിരുന്നുവ്രേത. ഞരമ്പിന് മുറിവേറ്റിട്ടില്ലെന്നും നിസാര പോറല്‍ മാത്രമേയുള്ളുവെന്നു ഡോക്ടര്‍മാര്‍ അറിയിച്ചു. റുവൈസിന്റെ പേരില്‍ കേസെടുത്തു. ഇയാള്‍ക്കെതിരേ വിവിധ സ്‌റ്റേഷനുകളില്‍ കേസുകളുണ്ടെന്ന് പൊലിസ് പറഞ്ഞു. റുവൈസ് സഞ്ചരിച്ച ബൈക്കും കസ്റ്റഡിയിലെടുത്തിട്ടുണ്ട്.