വടകര : മടപ്പള്ളി ഗവണ്‍മെന്റ് കോളജില്‍ വിദ്യാര്‍ഥി സംഘര്‍ഷത്തില്‍ നിരവധി പേര്‍ക്ക് പരുക്കേറ്റു. സംഘര്‍ഷം കോളജില്‍നിന്നു തെരുവിലേക്കിറങ്ങിയപ്പോള്‍ നാട്ടുകാരും വിദ്യാര്‍ഥികളുംതമ്മിലും സംഘര്‍ഷമുണ്ടായി. ഇതോടെ പൊലിസ് ലാത്തിവീശി.
സംഘര്‍ഷത്തില്‍ രണ്ട് നാട്ടുകാര്‍ക്കും പരുക്കേറ്റിട്ടുണ്ട്. കോളജില്‍ യു.ഡി.എസ്.എഫ് ഫ്രറ്റേര്‍ണിറ്റി പ്രവര്‍ത്തകരും എസ്.എഫ്.ഐയും തമ്മിലായിരുന്നു സംഘര്‍ഷമുണ്ടായത്.
ഉച്ചയോടെ ആരംഭിച്ച സംഘട്ടനത്തില്‍ എം.എസ്.എഫ് നേതാവും ഹരിത ജില്ലാ ജനറല്‍ സെക്രട്ടറിയുമായ തംജിത, കോളജിലെ യു.ഡി.എസ്എഫ് നേതാക്കളായ മുനവിര്‍, ഫ്രറ്റേര്‍ണിറ്റി പ്രവര്‍ത്തകരായ സല്‍വ അബ്ദുല്‍ ഖാദര്‍, ആദില്‍ എന്നിവര്‍ക്കും സംഭവമറിഞ്ഞ് എത്തിയ എം.എസ്.എഫ് വടകര മണ്ഡലം ജനറല്‍ സെക്രട്ടറി മന്‍സൂര്‍ ഒഞ്ചിയത്തിനും പരുക്കേറ്റു. ഇവരെ വടകര ജില്ലാ ആശുപത്രിയില്‍ പ്രവേശിപ്പിച്ചു.
എസ്.എഫ്.ഐ പ്രവര്‍ത്തകരായ അമല്‍, അനൂജ് എന്നിവര്‍ക്കും പരുക്കേറ്റിട്ടുണ്ട്. ഇവരെ വടകര സഹകരണ ആശുപത്രിയില്‍ പ്രവേശിപ്പിച്ചു. മടപ്പള്ളി കോളജിനടുത്ത് ബേക്കറി നടത്തുന്ന മനോഹരന്‍, ഊരാളിവീട്ടില്‍ മനോജ് എന്നിവര്‍ക്കാണ് പരുക്കേറ്റത്. ഇവരെ മാഹി ആശുപത്രിയില്‍ പ്രവേശിപ്പിച്ചു.
കോളജിലെ വനിതാ നേതാക്കളെ അക്രമിക്കുന്നത് കണ്ടാണ് ഇടപെട്ടതെന്ന് നാട്ടുകാര്‍ പറഞ്ഞു. സംഭവത്തില്‍ പ്രതിഷേധിച്ച് യു.ഡി.എസ്.എഫ് പ്രവര്‍ത്തകര്‍ വടകരയില്‍ പ്രകടനം നടത്തി.
അക്രമത്തില്‍ പരുക്കേറ്റവരെ മുല്ലപ്പള്ളി രാമചന്ദ്രന്‍ എം.പി, എം.എസ്.എഫ് ജില്ലാ ജനറല്‍ സെക്രട്ടറി അഫ്‌നാസ് ചോറോട്, മുസ്‌ലിംലീഗ് നേതാക്കളായ യു അഷ്‌റഫ്, ഫസല്‍ തങ്ങള്‍, അന്‍സാര്‍ മുകച്ചേരി, ഹാരിസ് ഒഞ്ചിയം, ജൗഹര്‍ വെള്ളികുളങ്ങര, കെ.എസ്.യു നേതാക്കളായ വി.പി ദുല്‍ഖിഫില്‍, വി.ടി സൂരജ്, എം.എസ്.എഫ് നേതാക്കളായ കെ.വി തന്‍വീര്‍, അന്‍സീര്‍ പനോളി, വി.പി ഷംസീര്‍ സന്ദര്‍ശിച്ചു.