തിരുവനന്തപുരം: സംഗീത സംവിധായകന്‍ ബാലഭാസ്‌കറിന്റെ അപകട മരണവുമായി ബന്ധപ്പെട്ട് ബാലഭാസ്‌കറിന്റെ ഡ്രൈവര്‍ അര്‍ജുനും ചലച്ചിത്രതാരം കലാഭവന്‍ സോബിയും നല്‍കിയ മൊഴികള്‍ കള്ളമാണെന്ന് കണ്ടെത്തി. സംഭവം നടക്കുമ്പോള്‍ വാഹനമോടിച്ചിരുന്നത് ബാലഭാസ്‌കറായിരുന്നെന്ന ഡ്രൈവര്‍ അര്‍ജുന്റെ മൊഴിയും സംഭവസ്ഥലത്ത് സ്വര്‍ണക്കടത്ത് സംഘാംഗത്തിന്റെ സാന്നിധ്യമുണ്ടായിരുന്നെന്ന കലാഭാവന്‍ സോബിയുടെ മൊഴിയുമാണ് കളവാണെന്ന് തെളിഞ്ഞത്. ഈ സാഹചര്യത്തില്‍ അപകടത്തില്‍ ദുരൂഹതയില്ലെന്നാണ് അന്വേഷണ സംഘത്തിന്റെ വിലയിരുത്തല്‍.
അപകടം ആസൂത്രിതമാണെന്നും സ്വര്‍ണക്കടത്ത് സംഘത്തിന് ഇതില്‍ പങ്കുണ്ടെന്നുമുള്ള ആരോപണത്തെ തുടര്‍ന്നാണ് കഴിഞ്ഞ മാസം ബാലഭാസ്‌കറിന്റെ മാനേജര്‍ പ്രകാശന്‍തമ്പി, സുഹൃത്ത് വിഷ്ണു സോമസുന്ദരം, ഡ്രൈവര്‍ അര്‍ജുന്‍ ബാലകൃഷ്ണന്‍, ആരോപണങ്ങളുയര്‍ത്തിയ കലാഭവന്‍ സോബി എന്നിവരെ സി.ബി.ഐ നുണപരിശോധനക്ക് വിധേയരാക്കിയത്. പരിശോധനാഫലം ലഭിച്ചതോടെ വാഹനമോടിച്ചത് അര്‍ജുന്‍ തന്നെയാണെന്ന്
വ്യക്തമായിട്ടുണ്ട്. അപകടസ്ഥലത്ത് സോബി കണ്ടെന്ന് പറഞ്ഞയാള്‍ ആ സമയത്ത് ബംഗളൂരുവിലായിരുന്നതായും കണ്ടെത്തി. സ്വര്‍ണക്കടത്ത് സംഘാംഗം റൂബിന്‍ തോമസിനെ കണ്ടെന്നായിരുന്നു സോബിയുടെ മൊഴി. അപകടത്തിനു മുമ്പ് ബാലഭാസ്‌കറിന്റെ കാര്‍ ആക്രമിക്കപ്പെട്ടെന്ന മൊഴിയും കളവാണെന്ന് കണ്ടെത്തിയിട്ടുണ്ട്. അന്വേഷണം തുടരുകയാണെങ്കിലും നുണപരിശോധനാഫലം ലഭിച്ചതോടെ അപകടവുമായി ബന്ധപ്പെട്ട ദുരൂഹതകള്‍ക്ക് അവസാനമാകുമെന്നാണ് വിലയിരുത്തല്‍. 2018 സെപ്റ്റംബര്‍ 25ന് പുലര്‍ച്ചെയാണ് ബാലഭാസ്‌കറും ഭാര്യയും മകളും സഞ്ചരിച്ചിരുന്ന വാഹനം തിരുവനന്തപുരത്ത് പള്ളിപ്പുറത്തിനടുത്തു നിയന്ത്രണംവിട്ട് റോഡരികിലുള്ള മരത്തിലിടിച്ചത്.