സാവോ പോളോ: കോപക്ക് ഉള്ളിലോ പുറത്തോ എന്ന് തീരുമാനിക്കുന്നതിന് വേണ്ടി പൊരുതാന്‍ അര്‍ജന്റീന ഇന്ന് ഇറങ്ങും. ആദ്യ മത്സരത്തിലെ തോല്‍വിയും രണ്ടാം മത്സരത്തിലെ സമനിലയും അര്‍ജന്റീനയുടെ പ്രീ ക്വാര്‍ട്ടര്‍ പ്രതീക്ഷകള്‍ തുലാസിലാക്കിയത് കാരണം ഇന്ന് അര്‍ജന്റീനയുടെ ജീവന്‍മരണ പോരാട്ടമായിരിക്കും. ഖത്തറാണ് എതിരാളികള്‍.

കഴിഞ്ഞ രണ്ട് തവണയും ചുണ്ടിന് മുന്നില്‍നിന്ന് നഷ്ടപ്പെട്ട കിരീടം തേടിയായിരുന്നു ഇത്തവണ അര്‍ജന്റീന ബ്രസീലിലെത്തിയത്. എന്നാല്‍ അര്‍ജന്റീനക്ക് തുടക്കം തന്നെ പിഴക്കുകയായിരുന്നു. ഇന്നത്തെ മത്സരത്തില്‍ ഖത്തറിനെ മികച്ച മാര്‍ജിനില്‍ തോല്‍പിച്ചാല്‍ അര്‍ജന്റീനക്ക് മികച്ച മൂന്നാം സ്ഥാനക്കാരായി പ്രീ ക്വാര്‍ട്ടറില്‍ പ്രവേശിക്കാം. രണ്ട് മത്സരങ്ങളിലും സൂപ്പര്‍ താരനിര അര്‍ജന്റീനക്കായി അണിനിരന്നെങ്കിലും ആദ്യ മത്സരത്തില്‍ ജെയിംസ് റോഡിഗ്രസിന്റെ കൊളംബിയക്ക് മുന്നില്‍ പതറുകയായിരുന്നു.

രണ്ടാം മത്സരത്തില്‍ പരാഗ്വെയോട് കഷ്ടപ്പെട്ടാണ് അര്‍ജന്റീന സമനില നേടിയത്. വാറിന്റെ സഹായം കൂടി ഇല്ലായിരുന്നെങ്കില്‍ രണ്ടാം മത്സരത്തിലും അര്‍ജന്റീന പരാജയപ്പെട്ടേനെ. 57-ാം മിനുട്ടില്‍ ലഭിച്ച പെനാല്‍റ്റി ലക്ഷ്യത്തിലെത്തിച്ചാണ് അര്‍ജന്റീന സമനിലയുമായി തടിതപ്പിയത്. ഇന്ന് ഏഷ്യന്‍ ചാംപ്യന്‍മാരായ ഖത്തറിനെതിരാണ്. അര്‍ജന്റീനക്ക് ഇന്നത്തെ മത്സരം സമ്മര്‍ദത്തിന്റേതാകും. കാരണം ഡു ഓര്‍ ഡൈ മെന്റാലിറ്റിയില്‍ കളിക്കുന്ന ഗെയിമില്‍ പലപ്പോഴും അര്‍ജന്റീനക്ക് ഫലം വിപരീതമാകാറുണ്ട്. ആദ്യ മത്സരത്തില്‍ പരാഗ്വെയെ 2-2 ന്റെ സമനിലയില്‍ പിടിച്ച ഖത്തറിന് അര്‍ജന്റീനയെ തളക്കുന്നതിന് ബുദ്ധിമുട്ടുണ്ടാകില്ല.

അര്‍ജന്റീനയെ തകര്‍ത്താല്‍ പട്ടികയില്‍ മൂന്നാം സ്ഥാനത്തെത്തുന്ന ഖത്തറിനും മൂന്നാം സ്ഥാനക്കാരായി പ്രീക്വാര്‍ട്ടറില്‍ പ്രവേശിക്കാനുള്ള സാധ്യതയുണ്ട്. അതിനാല്‍ ഖത്തറും ജീവന്‍മരണ പോരാട്ടം ലക്ഷ്യമിട്ടാണ് മെസ്സിയുടെ അര്‍ജന്റീനയെ നേരിടുന്നത്. മെസ്സിയുടെ അമിത മാനസിക സംഘര്‍ഷം ഖത്തറിന് പോസിറ്റീവായി ഉപയോഗിക്കാന്‍ കഴിഞ്ഞാല്‍ ഇന്നത്തെ മത്സരം വരുതിയിലാക്കി ഏഷ്യന്‍ ചാംപ്യന്‍മാര്‍ക്ക് പ്രീ ക്വാര്‍ട്ടര്‍ സ്വപ്നം കാണാം.

രാത്രി 12.30നാണ് മത്സരം. മറ്റൊരു മത്സരത്തില്‍ കൊളംബിയ പരാഗ്വെയെ നേരിടും. ആറു പോയിന്റുമായി പട്ടികയില്‍ ഒന്നാം സ്ഥാനത്തുള്ള കൊളംബിയ നേരത്തെ പ്രീ ക്വാര്‍ട്ടറില്‍ പ്രവേശിച്ചിരുന്നു. രണ്ട് പോയിന്റുമായി രണ്ടാം സ്ഥാനത്തുള്ള പരാഗ്വെ ജയിച്ചാല്‍ അനായാസം പ്രീ ക്വാര്‍ട്ടറില്‍ പ്രവേശിക്കാം.