ജയ്പൂര്‍: രാജസ്ഥാനിലെ ബാര്‍മറില്‍ കൂറ്റന്‍ പന്തല്‍ തകര്‍ന്നുവീണ് 14 പേര്‍ മരിച്ചു. ക്ഷേത്രത്തില്‍ രാമായണം കേള്‍ക്കാനെത്തിയ വിശ്വാസികളാണ് അപകടത്തില്‍പ്പെട്ടത്. അന്‍പതോളം പേര്‍ക്ക് പരുക്കേറ്റതായും റിപ്പോര്‍ട്ടുണ്ട്.

ശക്തമായ കാറ്റില്‍പ്പെട്ടാണ് പന്തല്‍ തകര്‍ന്നുവീണത്. പരുക്കേറ്റവരുടെ ചികിത്സയ്ക്കായി എല്ലാ സഹായങ്ങളും നല്‍കുമെന്ന് രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ട് അറിയിച്ചു.

ബാര്‍മറിലെ ജസോല്‍ ഏരിയയിലാണ് സംഭവം. രാം കഥ എന്ന ക്ഷേത്ര പരിപാടിയുടെ കൂറ്റന്‍ പന്തലാണ് തകര്‍ന്നുവീണത്.

പന്തല്‍ തകര്‍ന്നുവീണുണ്ടായ അപകടത്തില്‍ പ്രധാനമന്ത്രി നരേന്ദ്ര മോദി ദുഃഖം രേഖപ്പെടുത്തി. മരിച്ചവരുടെ കുടുംബങ്ങളുടെ ദുഃഖത്തിനൊപ്പം നില്‍ക്കുന്നതായും പരുക്കേറ്റവര്‍ എത്രയും പെട്ടെന്ന് സുഖം പ്രാപിക്കട്ടെ എന്നും പ്രധാനമന്ത്രി ട്വീറ്റ് ചെയ്തു.

അപകടത്തില്‍ രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ടും ദുഃഖം രേഖപ്പെടുത്തി. രക്ഷാപ്രവര്‍ത്തനങ്ങള്‍ പുരോഗമിക്കുകയാണെന്നും മരിച്ചവരുടെ ആത്മാക്കള്‍ക്കായി പ്രാര്‍ഥിക്കുന്നു എന്നും അദ്ദേഹം പറഞ്ഞു.