കോട്ടയം: കന്യാസ്ത്രീയെ പീഡനത്തിരയാക്കിയ കേസില്‍ ബിഷപ്പിനെതിരേ കൃത്രിമമായി തെളിവുണ്ടാക്കാന്‍ അന്വേഷണസംഘം ശ്രമിക്കുന്നതായി പി.സി ജോര്‍ജ് എം.എല്‍.എ. പീഡനം നടന്നതായി പരാതിയില്‍ പറയുന്നതിന്റെ പിറ്റേദിവസം കന്യാസ്ത്രീയുടെ ബന്ധുവിന്റെ വീട്ടിലെ ചടങ്ങില്‍ കന്യാസ്ത്രീയും ബിഷപ്പും സന്തോഷത്തോടെ ഒരുമിച്ചിരിക്കുന്ന ആറു ചിത്രങ്ങളും രണ്ട് വിഡിയോകളും തന്റെ പക്കലുള്ളതായും പി.സി ജോര്‍ജ് വാര്‍ത്താസമ്മേളനത്തില്‍ പറഞ്ഞു. ചിത്രവും സിഡിയും മാധ്യമപ്രവര്‍ത്തകരെ അദ്ദേഹം ഉയര്‍ത്തിക്കാട്ടി. ചടങ്ങിന്റെ ദൃശ്യങ്ങള്‍ പകര്‍ത്തിയ പെരുമ്പാവൂര്‍ സ്വദേശിയായ ഫോട്ടോഗ്രാഫര്‍ ഷൈജോയില്‍നിന്നു കന്യാസ്ത്രീ ദുഃഖിതയായി ഇരിക്കുന്നതു കണ്ടുവെന്ന വ്യാജമൊഴി അന്വേഷണ സംഘാംഗമായ എസ്.ഐ എഴുതിവാങ്ങുകയായിരുന്നുവെന്നും ജോര്‍ജ് പറഞ്ഞു.