കയ്യൂര്‍: എന്‍ഡോസള്‍ഫാന്‍ ദുരിതബാധിതര്‍ക്ക് പഠന സൗകര്യങ്ങള്‍ ഒരുക്കുന്നതില്‍ കടുത്ത അനാസ്ഥ. നിര്‍മാണം പൂര്‍ത്തിയായി രണ്ടു വര്‍ഷം തികയുമ്പോഴും കയ്യൂരിലെ ബഡ്‌സ് സ്‌കൂള്‍ കെട്ടിടം തുറന്നുകൊടുത്തില്ല.
വൈദ്യുതീകരണവുമായി ബന്ധപ്പെട്ട സാങ്കേതിക കുരുക്കുകളാണ് നേരത്തെ പുതിയ കെട്ടിടത്തിന്റെ ഉദ്ഘാടനത്തിനു തടസമായി പറഞ്ഞത്. എന്നാല്‍ വൈദ്യുതീകരണം പൂര്‍ത്തിയായി നാലുമാസം പിന്നിടുമ്പോഴും കെട്ടിടം പഞ്ചായത്തിനു കൈമാറേണ്ട നടപടികള്‍ എങ്ങുമെത്തിയില്ല. എന്‍ഡോസള്‍ഫാന്‍ വിഷമഴ ഏറ്റവും കൂടുതല്‍ ദുരിതം വിതച്ച പഞ്ചായത്തിലെ വിദ്യാര്‍ഥികളോടാണ് ഈ അവഗണന.
ഒന്നരക്കോടിയോളം ചെലവിലാണ് കെട്ടിട നിര്‍മാണം പൂര്‍ത്തിയാക്കിയത്. എന്നാല്‍ വയറിങ് പ്രവൃത്തി എസ്റ്റിമേറ്റില്‍ ഉള്‍പ്പെടുത്താതിരുന്നതിനാല്‍ ഒന്നരവര്‍ഷം അതിനായി കാത്തിരുന്നു. ഈ പ്രശ്‌നം പരിഹരിച്ചിട്ടും നിസാര കാരണങ്ങളാല്‍ കെട്ടിടം പഞ്ചായത്തിനു വിട്ടുകൊടുക്കുന്ന നടപടികള്‍ നീളുകയാണ്. കെട്ടിടം വിട്ടുകിട്ടിയാല്‍ മാത്രമെ പഞ്ചായത്തിന് വൈദ്യുതി കണക്ഷന് അപേക്ഷ നല്‍കാനാവൂ.
40 കുട്ടികള്‍ ഉള്ള കയ്യൂരിലെ ബഡ്‌സ് സ്‌കൂളില്‍ 20 കുട്ടികള്‍ സ്ഥിരമായി എത്തുന്നുണ്ട്. ഒരു വര്‍ഷത്തോളം പലോത്തെ ഒറ്റമുറി കമ്മ്യുണിറ്റി ഹാളിലായിരുന്നു കുട്ടികളുടെ പഠനം.
ഇപ്പോള്‍ ഞണ്ടാടിയിലെ കെട്ടിടത്തിലെ പരിമിതികള്‍ക്കുള്ളിലാണ് ക്ലാസ് നടക്കുന്നത്. അര്‍ഹതയുള്ളവരോടുള്ള അവഗണനയില്‍ രക്ഷിതാക്കള്‍ക്കും നാട്ടുകാര്‍ക്കും കടുത്ത പ്രതിഷേധമാണുള്ളത്.