ന്യൂഡല്‍ഹി: റാഫേല്‍ യുദ്ധവിമാന കരാറുമായി ബന്ധപ്പെട്ട് ഫ്രഞ്ച് മുന്‍ പ്രസിഡന്റ് ഫ്രാന്‍സോ ഹൊലാന്ദേ നടത്തിയ പരമാര്‍ശത്തെ തുടര്‍ന്ന് രാഷ്ട്രീയ വാക്‌പോരാട്ടം രൂക്ഷമായി. മുന്‍ ഫ്രഞ്ച് പ്രസിഡന്റ് പ്രധാനമന്ത്രിയെ കള്ളനെന്ന് വിളിച്ചെന്ന് ചൂണ്ടിക്കാട്ടി ഇന്നലെ നിയമ മന്ത്രി രവിശങ്കര്‍ പ്രസാദ് രൂക്ഷമായ ഭാഷയിലാണ് പ്രതികരിച്ചത്. നിരുത്തരവാദപരവും ലജ്ജാകരവുമായ പരാമര്‍ശമാണ് കോണ്‍ഗ്രസ് അധ്യക്ഷനില്‍ നിന്നുണ്ടായതെന്ന് അദ്ദേഹം ആരോപിച്ചു.
ഏതെങ്കിലും രാഷ്ട്രീയ പാര്‍ട്ടിയോ അവരുടെ അധ്യക്ഷനോ ഇത്തരത്തിലൊരു പ്രതികരണം ഇതിന് മുന്‍പ് നടത്തിയിട്ടില്ലെന്നും നിയമ മന്ത്രി പറഞ്ഞു. റിലയന്‍സ് കമ്പനിയെ ദസോള്‍ട്ട് ഏവിയേഷന്‍ തങ്ങളുടെ പങ്കാളിയാക്കിയത് 2012ല്‍ യു.പി.എ സര്‍ക്കാരിന്റെ കാലത്താണെന്നും അദ്ദേഹം ചൂണ്ടിക്കാട്ടി.
മോദിയെന്ന ആഗോള നേതാവിനെയാണ് രാഹുല്‍ ഗാന്ധി കള്ളനെന്ന് വിളിച്ചത്. ഇതില്‍ കൂടുതല്‍ അദ്ദേഹത്തില്‍ നിന്ന് പ്രതീക്ഷിക്കുന്നില്ല. നാഷനല്‍ ഹെറാള്‍ഡ് കേസില്‍ സോണിയക്കൊപ്പം പ്രതിസ്ഥാനത്ത് നില്‍ക്കുന്ന ആളാണ് രാഹുല്‍.
10 വര്‍ഷമായി മുടങ്ങിക്കിടന്ന കരാര്‍ പുതുക്കിയത് മോദിയാണ്. ഇടപാടുമായി ബന്ധപ്പെട്ട വിവരങ്ങള്‍ വെളിപ്പെടുത്തണമെന്ന ആവശ്യം ചൈനയേയും പാകിസ്താനേയും സഹായിക്കാനാണെന്നും രവിശങ്കര്‍ പ്രസാദ് ആരോപിച്ചു. രാജ്യത്തളിന്റെ ശത്രുക്കളുടെ കൈയ്യിലെ കളിപ്പാട്ടമാണ് രാഹുല്‍ എന്നും അദ്ദേഹം വിശേഷിപ്പിച്ചു.