ന്യൂഡല്‍ഹി: കോടതിയലക്ഷ്യ കേസില്‍ ആറുമാസം തടവിനു ശിക്ഷിച്ച വിധി പുനഃപരിശോധിക്കണമെന്ന കൊല്‍ക്കത്ത ഹൈക്കോടതി ജഡ്ജി സി.എസ് കര്‍ണന്റെ ഹരജി നിലനില്‍ക്കുന്നതല്ലെന്ന് സുപ്രിംകോടതി. ശിക്ഷ റദ്ദാക്കണമെന്ന് ആവശ്യപ്പെട്ട് കര്‍ണന്റെ അഭിഭാഷകന്‍ സമര്‍പ്പിച്ച ഹരജി സ്വീകരിക്കാനാകില്ലെന്ന് സുപ്രിംകോടതി രജിസ്ട്രിയാണ് വ്യക്തമാക്കിയത്. ഇക്കാര്യം കര്‍ണന്റെ അഭിഭാഷകനെ രജിസ്ട്രി അറിയിച്ചു.
തടവുശിക്ഷ റദ്ദാക്കണമെന്ന് ആവശ്യപ്പെട്ട് രാഷ്ട്രപതിയെ സമീപിച്ചതായി കഴിഞ്ഞ ദിവസം കര്‍ണന്റെ അഭിഭാഷകര്‍ അറിയിച്ചു. എന്നാല്‍, വിഷയത്തെ കുറിച്ച് കൂടുതല്‍ പഠിക്കേണ്ടതുണ്ടെന്ന് രാഷ്ട്രപതിയുടെ ഓഫിസ് മറുപടി നല്‍കിയതായി അവര്‍ പറഞ്ഞു.
മെയ് ഒന്‍പതിനാണ് സുപ്രിംകോടതിയുടെ ഏഴംഗ ബെഞ്ച് കോടതിയലക്ഷ്യ കേസില്‍ കര്‍ണന് ആറു മാസത്തെ തടവുശിക്ഷ വിധിച്ചത്. പശ്ചിമ ബംഗാള്‍ പൊലിസിന് അദ്ദേഹത്തെ കസ്റ്റഡിയിലെടുക്കാന്‍ കോടതി നിര്‍ദേശവും നല്‍കിയിട്ടുണ്ട്. എന്നാല്‍, കര്‍ണനെ ഇതുവരെ അറസ്റ്റ് ചെയ്യാനായിട്ടില്ല. കോടതി വിധിക്കെതിരേ കര്‍ണന്‍ അഭിഭാഷകര്‍ മുഖേന കോടതിയില്‍ ഹരജി സമര്‍പ്പിക്കുകയായിരുന്നു.അറസ്റ്റ് ഭയന്ന് അദ്ദേഹം ഒളിവിലാണുള്ളത്. കര്‍ണന്‍ ചെന്നൈയിലാണുള്ളതെന്നും നേപ്പാളിലേക്കു കടന്നെന്നും പ്രചാരണമുണ്ടായിരുന്നു.