ന്യൂഡെല്‍ഹി: ഗോസംരക്ഷകരെന്ന പേരില്‍ നടത്തുന്ന ആള്‍കൂട്ട ആക്രമണങ്ങള്‍ക്ക് മൂക്കുകയറിടാന്‍ മധ്യപ്രദേശ് സര്‍ക്കാര്‍. ഗോരക്ഷാ പ്രവര്‍ത്തനമെന്ന പേരില്‍ നടത്തുന്ന പ്രവൃത്തികള്‍ ക്രിമിനല്‍ കുറ്റമായി കണക്കാക്കാനുള്ള നിയമഭേദഗതിക്ക് ഇന്ന് ചേര്‍ന്ന ക്യാബിനറ്റ് യോഗം അംഗീകാരം നല്‍കി. നിയമം പ്രാബല്യത്തില്‍ വന്നാല്‍ പശുവിന്റെ പേരില്‍ നടത്തുന്ന ഏത് ആക്രമണങ്ങള്‍ക്കും ആറ് മാസം മുതല്‍ മൂന്ന് വര്‍ഷം വരെ തടവ് ശിക്ഷ ലഭിക്കും. കാല്‍ ലക്ഷം മുതല്‍ അരലക്ഷം വരെ പിഴ ചുമത്താനുമാവും.

കഴിഞ്ഞ ബി.ജെ.പി മന്ത്രിസഭ കൊണ്ടുവന്ന ഗോവധ നിരോധന നിയമത്തില്‍ മാറ്റം വരുത്താനും നടപടി സ്വീകരിക്കുമെന്ന് മധ്യപ്രദേശ് മുഖ്യമന്ത്രി കമല്‍നാഥ് പറഞ്ഞു. അതേസമയം ശിക്ഷാ കാലാവധി ഒരു വര്‍ഷം മുതല്‍ അഞ്ച് വര്‍ഷം വരെയാക്കി ഉയര്‍ത്തുന്ന കാര്യം ഭാവിയില്‍ പരിഗണിക്കുമെന്ന് മൃഗസംരക്ഷണ വകുപ്പ് അഡീ. ചീഫ് സെക്രട്ടറി മനോജ് ശ്രിവാസ്തവ പറഞ്ഞു.

മധ്യപ്രദേശ് നിയമസഭയുടെ മണ്‍സൂണ്‍ സെഷന്‍ അടുത്ത ജൂലൈ എട്ടിന് ചേരാനിരിക്കുകയാണ്. നിയമസഭയില്‍ ഓര്‍ഡിനന്‍സ് പാസാകുന്നതോടെ രാജ്യത്ത് ഗോരക്ഷാ ആക്രമണങ്ങള്‍ക്കെതിരേ ആദ്യമായി നിയമം പാസാക്കുന്ന സംസ്ഥാനമെന്ന പേര് മധ്യപ്രദേശിന് സ്വന്തമാകും.