കോട്ടയം.മുന്നണി മര്യാദയും രാഷ്ട്രീയ ബാലപാഠങ്ങളും കേരളകോണ്‍ഗ്രസിന് ഉപദേശിക്കുവാന്‍ യൂത്ത്‌കോണ്‍ഗ്രസും  ഡീന്‍ കുര്യാക്കോസും വളര്‍ന്നിട്ടില്ലെന്നു യൂത്ത്ഫ്രണ്ട് സീനിയര്‍ ജനറല്‍സെക്രട്ടറി സാജന്‍ തൊടുക .ആദ്യം സ്വന്തം സംഘടനയേയും മാതൃസംഘടനയേയും അനിവാര്യമായ കപ്പല്‍ഛേദത്തില്‍ നിന്നും രക്ഷിക്കാന്‍ സേവ് കോണ്‍ഗ്രസ് യാത്ര നടത്തുകയാണ് വേണ്ടത്. ഇതിനായി സ്ഥാനമൊഴിഞ്ഞ് കൊള്ളാവുന്നവര്‍ യൂത്ത്‌കോണ്‍ഗ്രസിലുണ്ടെങ്കില്‍ അവര്‍ക്കായി വഴിമാറുകയാണ് ഡീന്‍ ചെയ്യേണ്ടതെന്നും അദ്ദേഹം പറഞ്ഞു.
കഴിഞ്ഞ ലോക്‌സഭാ തെരെഞ്ഞെടുപ്പില്‍ സ്വന്തം വാര്‍ഡില്‍ നൂറില്‍പ്പരം വോട്ടുകള്‍ക്ക് പിന്നില്‍പ്പോയി സമ്പൂര്‍ണ പരാജിതനായ യൂത്ത് കോണ്‍ഗ്രസ് നേതാവ് അപരാജിതനായ കെ.എം മാണിക്ക് ബുദ്ധി ഉപദേശിക്കാനായിട്ടില്ലെന്നും സാജന്‍ തൊടുക പറഞ്ഞു. കെ.എം  മാണിയേയും ജോസ് കെ. മാണിയേയും ആക്ഷേപിച്ച് ഞെളിയാനാണ് ഡീന്‍ ശ്രമിക്കുന്നത്.ഗ്രൂപ്പിന്റെ ഒറ്റ പേരില്‍ പ്രസിഡന്റായി എന്നല്ലാതെ എന്തു യോഗ്യതയാണ് ഡീനിനുള്ളത്.
കോണ്‍ഗ്രസും യു.ഡി.എഫും തകര്‍ന്നുകൊണ്ടിരിക്കുകയാണ്. കോണ്‍ഗ്രസില്‍ നിന്നുയരുന്ന സ്വരങ്ങളെല്ലാം ദീനരോധനങ്ങളാണ്. യു.ഡി. എഫിലേക്ക് അപേക്ഷ നല്‍കി കാത്തിരിക്കുന്ന കക്ഷിയല്ല കേരളകോണ്‍ഗ്രസ്.
കേരള കോണ്‍ഗ്രസ് യു.ഡി.എഫിലേക്കില്ലെന്നു തീര്‍ത്തു പറഞ്ഞിട്ടും എല്ലായ്‌പ്പോഴും കേരള കോണ്‍ഗ്രസിനെ മുന്നണിയിലേക്ക് വേണ്ട എന്നൊക്കെ പറയുന്നത് അല്‍പത്തമാണ്.ഡീനിന് ഇനിയും രാഷ്ട്രീയ പക്വത വന്നിട്ടില്ലായെന്നുള്ളതിന്റെ പ്രകടമായ തെളിവാണിതെന്നും സാജന്‍ തൊടുക പറഞ്ഞു. ഞങ്ങളുടെ പാര്‍ട്ടിയില്‍ കാര്യം തീരുമാനിക്കുന്നത് പാര്‍ട്ടി ലീഡറാണ് .അദ്ധേഹം പാര്‍ട്ടി നിലപാട് അറിയിച്ചിട്ടുണ്ട്. അദ്ദേഹത്തിന്റെ തീരുമാനത്തിനൊപ്പമാണ് പാര്‍ട്ടി നേതാക്കളും അണികളുമെന്ന് അദ്ദേഹം പറഞ്ഞു.