മട്ടാഞ്ചേരി: ബസില്‍ വച്ച് കണ്ടക്ടര്‍ യുവതിയെ അപമാനിച്ചതായി പരാതി. കാക്കനാട് ഫോര്‍ട്ട്‌കൊച്ചി റൂട്ടിലോടുന്ന സ്വകാര്യബസിലെ കണ്ടക്ടര്‍ ഇന്നലെ ഉച്ചയ്ക്ക് വെളിയില്‍ വച്ച് ഫോര്‍ട്ട്‌കൊച്ചി സ്വദേശിനിയായ 21 കാരിയോട് മോശമായി പെരുമാറുകയായിരുന്നു. ജോലി സംബന്ധമായ ആവശ്യത്തിന് കാക്കനാട് കലക്ട്രേറ്റില്‍ പോയ യുവതി ഫോര്‍ട്ട്‌കൊച്ചിയിലേക്ക് തിരിച്ചുവരുമ്പോഴാണ് സംഭവം.
ഈ സമയം ബസില്‍ ഡ്രൈവറേയും കണ്ടക്ടറേയും കൂടാതെ മറ്റ് രണ്ട് പുരുഷ യാത്രക്കാര്‍ മാത്രമാണുണ്ടായിരുന്നത്. യുവതി ഇരിക്കുന്ന സീറ്റിന് പിറകില്‍ ഇരുന്ന കണ്ടക്ടര്‍ യുവതിയെ കയറിപിടിക്കുകയായിരുന്നു. ഭ
യന്ന് പോയ യുവതി പ്രതികരിച്ചപ്പോള്‍ ഇയാള്‍ കൈ മാറ്റി. ഈ സമയം മറ്റ് രണ്ട് യാത്രക്കാര്‍ വെളിയില്‍ ഇറങ്ങുകയും ചെയ്തു. തൊട്ടടുത്ത അമരാവതി സ്റ്റോപ്പിലാണ് യുവതിക്ക് ഇറങ്ങേണ്ടിയിരുന്നത്. ബസ് ഈ സ്റ്റോപ്പില്‍ നിര്‍ത്താതെ മുന്നോട്ട് പോയതോടെ യുവതി ബഹളം വച്ചു. ഇതുകേട്ട ഡ്രൈവര്‍ ബസ് നിര്‍ത്തുകയും യുവതി ഇറങ്ങിയ ഉടനെ ബസ് വേഗത്തില്‍ പോകുകയും ചെയ്തു.
ഭയന്ന യുവതിക്ക്  ബസിന്റെ പേരോ നമ്പറോ മനസിലാക്കാന്‍ കഴിഞ്ഞില്ല. അവിടെ നിന്ന് യുവതി കണ്‍ട്രോല്‍ റൂമില്‍ വിവരം അറിയിച്ചു. തുടര്‍ന്ന് ബന്ധുക്കളോടൊപ്പം എത്തി ഫോര്‍ട്ട്‌കൊച്ചി പൊലിസിന് പരാതി നല്‍കുകയായിരുന്നു. സംഭവത്തില്‍ ഫോര്‍ട്ട്‌കൊച്ചി എസ്.ഐയുടെ നേതൃത്വത്തില്‍ അന്വേഷണം ആരംഭിച്ചു.