കൊല്ലങ്കോട്: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പിതാവ് അറസ്റ്റില്‍. ശിശു സംരക്ഷണ ഓഫിസറാണ് കൊല്ലങ്കോട് പൊലിസില്‍ പരാതി നല്‍കിയത്. പതിനേഴുകാരിയുടെ പരാതിയില്‍ പോക്‌സോ നിയമപ്രകാരമാണ് കേസ് എടുത്തത്. ഇന്നലെ വൈകുന്നേരമാണ് പ്രതിയെ അറസ്റ്റ് ചെയ്തതെന്ന് കൊല്ലങ്കോട് സര്‍ക്കിള്‍ ഇന്‍സ്‌പെക്ടര്‍ ബെന്നി പറഞ്ഞു. പെണ്‍കുട്ടിയുടെ പരാതിയില്‍ പോക്‌സോ നിയമപ്രകാരം കേസെടുത്തിട്ടും പ്രതിയെ അറസ്റ്റ് ചെയ്തില്ലെന്ന് വ്യാപകമായ ആക്ഷേപം ഉയര്‍ന്നതോടെയാണ് അറസ്റ്റ് ഉണ്ടായത്. പെണ്‍കുട്ടി ശിശുസംരക്ഷണ വിഭാഗത്തിന്റെ സംരക്ഷണത്തിലാണ് കഴിയുന്നത്. അച്ഛനാണ് പ്രതി എന്നതിനാല്‍ വീട്ടില്‍ നില്‍ക്കാന്‍ കഴിയാത്തതിനാലാണ് ശിശുസംരക്ഷണ വിഭാഗത്തിലെ സംരക്ഷണയില്‍ കഴിയുന്നതെന്ന് ശിശുസംരക്ഷണ അധികൃതര്‍ പറഞ്ഞു.