റിയാദ്: സഊദി അറേബ്യ ഇന്ന് ദേശീയ ദിനം ആചരിക്കുന്നു. ആലു സഊദ് ഭരണത്തിന് കീഴിൽ രാജ്യത്തിന്റെ ഭരണം വന്നെത്തിയതിന്റെ വാർഷികമായാണ് ദേശീയ ദിനം ആചരിക്കുന്നത്. 88 വർഷങ്ങൾക്ക് മുൻപ്  സെപ്‌തംബർ 23നാണ് നിലവിലെ ആധുനിക സഊദി ഭരണകൂടം നിലവിൽ വന്നത്.

 

അബ്ദുൽ അസീസ് ബിൻ അബ്‌ദുറഹ്‌മാൻ ബിൻ ഫൈസൽ ബിൻ തുർക്കി ബിൻ അബ്ദുള്ളാഹ്  ബിൻ മുഹമ്മദ് അൽ സഊദ് ആണ് സഊദി ഭരണകൂടം സ്ഥാപിച്ചത്. തുടർന്ന് അദ്ദേഹത്തിനെ മക്കളിൽ ആറാമനാണ് ഇപ്പോൾ ഭരണം നടത്തുന്ന സഊദി ഭരണാധികാരി സൽമാൻ ബിൻ അബ്ദുൽ അസീസ് രാജാവ്. നിലവിൽ സൽമാൻ രജാവിന്റെ മകൻ മുഹമ്മദ് ബിൻ സൽമാൻ രാജകുമാരനാണ് കിരീടാവകാശി. 

 

ആഘോഷങ്ങളുടെ ഭാഗമായി രാജ്യത്തിനെ വിവിധ പ്രദേശങ്ങൾ ഹരിത പതാകയും കൊടിതോരണങ്ങളാലും  വർണ്ണാഭമാക്കിയിട്ടുണ്ട്. സർക്കാർ, സ്വകാര്യ മേഖലാ ജീവനക്കാർക്ക് പൊതുഅവധിയായത് ദേശീയദിനാഘോഷങ്ങൾക്ക് ഇരട്ടി മധുരം നൽകുകയും ആഘോഷ പരിപാടികളിലെ ജനപങ്കാളിത്തം ഉയർത്തുകയും ചെയ്യും. തെരുവുകളും കെട്ടിടങ്ങളും വ്യാപാര സ്ഥാപനങ്ങളിലും കെട്ടിടങ്ങളുടെ മുൻവശങ്ങളിലും റോഡുകളിലെ ബോർഡുകളിലും ഭരണാധികാരികളുടെ ഫോട്ടോകൾ ഉയർത്തി അലങ്കരിച്ചിട്ടുണ്ട്. 

 

തലസ്ഥാന നഗരിയിലെ പന്ത്രണ്ടു റോഡുകളും വർണപ്രഭയിൽ കുളിച്ചുനിൽക്കുന്നു.  ദേശീയദിനത്തോടനുബന്ധിച്ച് രാജ്യത്തെ നഗരങ്ങളിൽ നടക്കുന്ന പരിപാടികൾ അറിയുന്നതിന് സഹായിക്കുന്ന ആപ്പും റിയാദ് നഗരസഭ പുറത്തിറക്കി. തിരുഗേഹങ്ങളുടെ സേവകൻ സൽമാൻ രാജാവിന്റെയും കിരീടാവകാശി മുഹമ്മദ് ബിൻ സൽമാൻ രാജകുമാരന്റെയും സന്ദേശങ്ങളും ആപ്ലിക്കേഷനിൽ ഉൾപ്പെടുത്തിയിട്ടുണ്ട്. 

---

---