ജിദ്ദ: വിശുദ്ധ കഅ്ബാലയത്തെ അണിയിക്കുന്നതിനുള്ള പുതിയ കിസ്‌വയുടെ നിര്‍മാണം പൂര്‍ത്തിയായി. ഉമ്മുജൂദ് ഡിസ്ട്രിക്ടിലെ ഫാക്ടറിയില്‍ വച്ചാണ് പുതിയ കിസ്‌വയുടെ നിര്‍മാണം നടന്നത്. ആകെ അഞ്ചു കഷ്ണങ്ങള്‍ അടങ്ങിയതാണ് കിസ്‌വ.

കഅബാലയത്തിന്റെ നാലു ഭാഗത്തേക്കുമുള്ള ഓരോ കഷ്ണങ്ങളും തനിസ്വര്‍ണത്തില്‍ നിര്‍മിച്ച വാതിലിന് അലങ്കാരമായി മുകളില്‍ തൂക്കുന്ന വിരിയും കഅ്ബാലയത്തില്‍ സ്ഥാപിച്ച ശേഷം പരസ്പരം തുന്നിച്ചേര്‍ക്കുകയാണ് ചെയ്യുക.

കഅ്ബാലയത്തിന്റെയും മഖാമു ഇബ്രാഹിമിന്റെയും താക്കോലുകള്‍ സൂക്ഷിക്കുന്നതിനുള്ള സഞ്ചികളും നിര്‍മിച്ചു കഴിഞ്ഞിട്ടുണ്ട്. ഇസ്‌ലാമിക കാലിഗ്രാഫിയും വിശുദ്ധ ഖുര്‍ആന്‍ സൂക്തങ്ങളും സ്വര്‍ണ, വെള്ളിനൂലുകള്‍ ഉപയോഗിച്ച് എംബ്രോയ്ഡറി ചെയ്ത വിരി അലങ്കരിച്ചതായി കിസ്‌വ ഫാക്ടറി മേധാവി ഡോ. മുഹമ്മദ് ബാജോദ അറിയിച്ചു.

ഈ കിസ്‌വ മക്കയിലാണ് നിര്‍മിച്ചതെന്നും തിരുഗേഹങ്ങളുടെ സേവകന്‍ സല്‍മാന്‍ രാജാവാണ് കിസ്‌വ കഅ്ബാലയത്തിന് സംഭാവന ചെയ്തതെന്നും വ്യക്തമാക്കുന്ന വാചകങ്ങളും വിരിയില്‍ രേഖപ്പെടുത്തിയിട്ടുണ്ട്.
പ്രകൃതിദത്തമായ പട്ടില്‍ നിര്‍മിച്ച വിരിയുടെ ഉയരം 6.35 മീറ്ററും വീതി 3.33 മീറ്ററുമാണ്.