ബാഴ്‌സലോണ: ബാഴ്‌സലോണ താരം ആന്റോയിന്‍ ഗ്രീസ്മാനെതിരേ പ്രതിഷേധവുമായി ബാഴ്‌സലോണ ആരാധകര്‍. ബാഴ്‌സ താരം ലയണല്‍ മെസ്സിക്ക് റെസ്‌പെക്റ്റ് നല്‍കൂ എന്നാവശ്യപ്പെട്ടു കൊണ്ടാണ് പരിശീലനം കഴിഞ്ഞ് പുറത്ത് വന്ന ഗ്രീസ്മാനോട് ആരാധകര്‍ ആവശ്യപ്പെട്ടത്. ലയണല്‍ മെസ്സിക്കെതിരേ ഗ്രീസ്മാന്റെ മുന്‍ ഏജന്റ് നടത്തിയ പരാമര്‍ശങ്ങളാണ് ബാഴ്‌സ ആരാധകരുടെ പ്രതിഷേധത്തിന് കാരണം. ഗ്രീസ്മാന്റെ ബാഴ്‌സയിലേക്കുള്ള നീക്കം നടക്കേണ്ടിയിരുന്നില്ലെന്നും അതില്‍ താരത്തിനും വിഷമമുണ്ടെന്നാണ് മുന്‍ ഏജന്റായ എറിക് ഓള്‍ഹാട്‌സ് പറഞ്ഞത്. ബാഴ്‌സയില്‍ കാര്യങ്ങളെല്ലാം മെസ്സിയുടെ നിയന്ത്രണത്തിലാണെന്നും ബാഴ്‌സയില്‍ ഗ്രീസ്മാന്‍ എത്തിയതിനോട് മെസ്സിക്ക് താല്‍പര്യം ഉണ്ടായില്ലെന്നും കൂട്ടിച്ചേര്‍ത്തു. ഇതിന് പിന്നാലെ തന്നെ തനിക്ക് മെസ്സിയുമായി സൗഹാര്‍ദപരമായ ഒരു ബന്ധമാണുള്ളതെന്ന് ഗ്രീസ്മാന്‍ പ്രതികരിച്ചിരുന്നെങ്കിലും ആരാധകര്‍ ഇത് ചെവിക്കൊണ്ടിട്ടില്ല. ഇതിന്റെ തുടര്‍ച്ചയായിട്ടാണ് ഗ്രീസ്മാനെതിരേയുള്ള ബാഴ്‌സലോണ ആരാധകരുടെ പ്രതിഷേധം.