കൊടുവള്ളി: വാവാട് വില്ലേജ് ഓഫിസ് പരിധിയില്‍പ്പെട്ട വാവാട് സെന്ററിലെ ചക്കര വയല്‍പ്രദേശം മണ്ണിട്ട് നികത്താനുള്ള ശ്രമം നാട്ടുകാര്‍ തടഞ്ഞു. വാവാട് സെന്റര്‍ അങ്ങാടിക്ക് പിന്‍വശത്തെ വയലിലാണ് വെള്ളിയാഴ്ച്ച വൈകിട്ടോടെ നികത്താനായി മണ്ണിട്ടത്.
ഇത് ശ്രദ്ധയില്‍പെട്ട നാട്ടുകാര്‍ ശനിയാഴ്ച്ച രാവിലെ പ്രതിഷേധിക്കുകയും വിവരം പൊലിസിനേയും റവന്യൂ അധികൃതരേയും അറിയിക്കുകയായിരുന്നു. ഉച്ചയോടെ സ്ഥലത്തെത്തിയ വാവാട് വില്ലേജ് ഓഫിസറെ നടപടിയാവശ്യപ്പെട്ട് നാട്ടുകാര്‍ തടഞ്ഞു. നികത്തിയ മണ്ണ് നീക്കം ചെയ്യണമെന്നും വയല്‍ നികത്തിയവര്‍ക്കെതിരേ നടപടി സ്വീകരിക്കണമെന്നും ആവശ്യപ്പെട്ടാണ് തടഞ്ഞത്.
വയലില്‍ മണ്ണിട്ട് നികത്തിയവര്‍ക്ക് സ്റ്റോപ്പ് മെമ്മോ നല്‍കി ഇറക്കിയ മണ്ണ് ഉടമ തന്നെ നീക്കം ചെയ്തതോടെയാണ് നാട്ടുകാര്‍ പ്രതിഷേധം അവസാനിപ്പിച്ചത്. ചക്കരവയലില്‍ വിവിധയിടങ്ങളില്‍ കെട്ടിടനിര്‍മാണങ്ങള്‍ക്കും മറ്റും വയല്‍ നികത്തിയിട്ടുണ്ട്. ഉദ്യോഗസ്ഥരെ സ്വാധീനിച്ചും എതിര്‍ക്കുന്നവരെ ഭീഷണിപ്പെടുത്തിയും വയല്‍നികത്താന്‍ ശ്രമിക്കുന്നവര്‍ക്കെതിരേ തുടര്‍ന്നും ശക്തമായ പ്രതിഷേധം സംഘടിപ്പിക്കുമെന്ന് നാട്ടുകാര്‍ പറഞ്ഞു.
ഇക്കഴിഞ്ഞ പ്രളയകാലത്ത് വാവാട് സെന്റര്‍ അങ്ങാടിയില്‍ ദേശീയപാതയില്‍ മുന്‍പൊന്നുമില്ലാത്ത രീതിയില്‍ വെള്ളം കയറിയത് ചക്കരവയല്‍ മണ്ണിട്ട് നികത്തിയത് മൂലമാണെന്ന് നേരത്തെ ആക്ഷേപയമുയര്‍ന്നിരുന്നു.