ചവറ: ഗൃഹപ്രവേശത്തിന് ക്ഷണിക്കപ്പെട്ട് എത്തിയവര്‍ക്ക് പ്രതീക്ഷിക്കാത്ത സമ്മാനമായി പച്ചക്കറിവിത്തുകള്‍ നല്‍കിയത് കൗതുകമായി. പന്മന മനയില്‍ വെട്ടളച്ചം വീട്ടില്‍ ഹാരിസാണ് സ്വപ്ന സാക്ഷാത്കാരമായി നിര്‍മിച്ച വീടിന്റെ പ്രവേശന ചടങ്ങില്‍ എത്തിയവര്‍ക്ക് പായ്ക്ക് ചെയ്ത പച്ചക്കറി വിത്തുകള്‍ നല്‍കി കാര്‍ഷിക നന്മ പങ്കുവച്ചത്. ഗൃഹപ്രവേശന ചടങ്ങിലേക്ക് എത്തിയവര്‍ക്ക് ആദ്യം സമ്മാനിച്ചത് വിത്തുകളാണ്.
മുളക്, പയര്‍, ചീര, പാവല്‍, വെണ്ട എന്നിങ്ങനെ അഞ്ചിനം വിത്തുകളാണ് നല്‍കിയത്. ഒപ്പം ജൈവവളം ഉപയോഗിച്ച് ശ്രദ്ധയോടെ കൃഷി ചെയ്യണമെന്ന ഉപദേശവും. 3000 പേര്‍ക്കാണ് വിത്തുകള്‍ സമ്മാനിച്ചത്. ജിവിതത്തില്‍ പ്രധാനപ്പെട്ട ഒരു ദിവസം എത്തിയപ്പോള്‍ അതിനെ എന്നും ഓര്‍ക്കാനും നഷ്ടമായ കാര്‍ഷിക സമൃദ്ധി വീണ്ടെടുക്കാനുമുള്ള ചിന്തയാണ്  വിത്തു വിതരണത്തിന് പ്രേരിപ്പിച്ചതെന്ന് ഹാരിസ് പറഞ്ഞു. വിശേഷത്തില്‍ പങ്ക് കൊള്ളാന്‍ എത്തിയപ്പോള്‍ കിട്ടിയ വിത്തുകള്‍ നന്നായി കൃഷി ചെയ്ത് പരിപാലിക്കുമെന്ന് വിത്തുകള്‍ വാങ്ങിയവര്‍ പറഞ്ഞു. കേബിള്‍ ടിവി സര്‍വിസും, ഹയര്‍ ആന്‍ഡ് ഗുഡ്‌സ് ബിസിനസ്സും നടത്തി വരികയാണ് ഹാരിസ്.