വടക്കാഞ്ചേരി: മദ്യലഹരിയില്‍ സ്‌കൂള്‍ വാഹനവുമായി അമിത വേഗതയിലെത്തിയ ഡ്രൈവറെ പൊലിസ് അറസ്റ്റ് ചെയ്തു.
പാഞ്ഞാള്‍ സ്വദേശി ഗിരീഷ് (27) ആണ് പിടിയിലായത്. ഇന്നലെ കാലത്ത് വാഴക്കോട് വാഹന പരിശോധനയ്ക്കിടെയായിരുന്നു വടക്കാഞ്ചേരി എസ്.ഐ കെ.സി രതീഷിന്റെ നേതൃത്വത്തിലുള്ള പൊലിസ് സംഘം യുവാവിനെ അറസ്റ്റ് ചെയ്തത്.
അകമല ഭാരതീയ വിദ്യാഭവന്‍ സ്‌കൂളിലേക്ക് കരാര്‍ അടിസ്ഥാനത്തില്‍ വിദ്യാര്‍ഥികളെ കൊണ്ടുവരുന്ന വാഹനത്തിലെ ഡ്രൈവറാണ് ഗിരീഷ്.

എരുമപ്പെട്ടി: മദ്യപിച്ച് സ്‌കൂള്‍ വാഹനം ഓടിയ്ക്കാന്‍ ശ്രമിച്ച ഡ്രൈവറെ എരുമപ്പെട്ടി പൊലിസ് അറസ്റ്റ് ചെയ്തു.
പന്നിത്തടം ചിറമനേങ്ങാട് പ്രവര്‍ത്തിക്കുന്ന സ്വകാര്യ ഇംഗ്ലീഷ് മിഡിയം സ്‌കൂളിലെ ബസ്‌ഡ്രൈവര്‍ മരത്തംകോട് കിടങ്ങൂര്‍ കുന്നത്ത് വീട്ടില്‍ ലോയ് (55 )നെയാണ് പൊലിസ് അറസ്റ്റ് ചെയ്തത്.
സിറ്റി പൊലിസ് കമ്മിഷണറുടെ നിര്‍ദേശപ്രകാരം സ്‌കൂള്‍ വാഹനങ്ങള്‍ കേന്ദ്രീകരിച്ച് നടത്തിയ പ്രത്യേക പരിശോധനയിലാണ് ഇയാള്‍ പിടിയിലായത്. ഇന്നലെ രാവിലെ കുട്ടികളെ കൊണ്ട് വരുന്നതിനായി വാഹനമെടുക്കാന്‍ സ്‌കൂളിലെത്തിയതായിരുന്നു ഇയാള്‍. സ്ഥലത്തെത്തിയ പൊലിസിന്റെ പരിശോധനയില്‍ ഇയാള്‍ മദ്യപിച്ചതായി കണ്ടെത്തുകയായിരുന്നു. അറസ്റ്റ് ചെയ്ത ഇയാള്‍ക്ക് സ്റ്റേഷനില്‍ നിന്നും ജാമ്യം അനുവദിച്ചു. അതേ സമയം മദ്യപിച്ച് സ്‌കൂളിലെത്തിയ ഇയാളെ ജോലിയില്‍ നിന്നും പിരിച്ച് വിട്ടതായും സ്‌കൂള്‍ മാനേജര്‍ അറിയിച്ചു.