കോഴിക്കോട്: ബിവറേജസ് കോര്‍പറേഷന്റെ പ്രീമിയം കൗണ്ടറില്‍ വരി തെറ്റിച്ച് ഇടിച്ചുകയറി വിലകൂടിയ മദ്യക്കുപ്പികള്‍ കവര്‍ന്നോടിയ രണ്ടംഗ സംഘം അറസ്റ്റില്‍. ഒളവണ്ണ സ്വദേശി മീത്തല്‍ ചെറുവഴിപറമ്പ് വീട്ടില്‍ മുഹമ്മദ് അലി (42), ചെമ്മങ്ങാട് ഫ്രാന്‍സിസ് റോഡ് സ്വദേശി മീത്തല്‍ ചെറിയവീട്ടില്‍ ഷര്‍ഷാദ് അബ്ദുല്‍ ഗഫൂര്‍ (33) എന്നിവരാണ് അറസ്റ്റിലായത്.
പാവമണി റോഡിലെ ബിവറേജസ് പ്രീമിയം ഔട്ട്‌ലെറ്റില്‍ ഞായറാഴ്ച വൈകിട്ടാണു കേസിനാസ്പദമായ സംഭവം. വരി തെറ്റിച്ച് മുന്‍നിരയിലേക്ക് കടക്കാന്‍ ശ്രമിച്ച ഇവരെ മറ്റുള്ളവര്‍ തടയാന്‍ ശ്രമിച്ചിട്ടും ബലംപ്രയോഗിച്ച് കൗണ്ടറില്‍ കടക്കുകയായിരുന്നെന്ന് പൊലിസ് പറഞ്ഞു. ബഹളത്തിനിടെ കൗണ്ടറില്‍നിന്ന് ബലമായി മൂന്നു മദ്യക്കുപ്പികള്‍ എടുത്ത് ഇവര്‍ പുറത്തേക്ക് ഓടിരക്ഷപ്പെട്ടു.
വരിയിലുണ്ടായിരുന്ന ചിലര്‍ ഇവരില്‍ ഒരാളെ തിരിച്ചറിഞ്ഞതിന്റെ അടിസ്ഥാനത്തില്‍ കസബ എസ്.ഐ വി. സിജിത്തിന്റെ നേതൃത്വത്തില്‍ ഷര്‍ഷാദിനെ ഞായറാഴ്ച രാത്രി തന്നെ വീട്ടില്‍നിന്ന് അറസ്റ്റ് ചെയ്യുകയായിരുന്നു.
ഇയാളില്‍ നിന്ന് ലഭിച്ച വിവരമനുസരിച്ചാണ് മുഹമ്മദലിയെ ഇന്നലെ രാവിലെ ഒളവണ്ണയില്‍നിന്ന് പിടികൂടിയത്. കവര്‍ന്ന മദ്യത്തില്‍ ഉപയോഗിച്ചതിന്റെ ബാക്കി കസ്റ്റഡിയിലെടുത്തതായി പൊലിസ് അറിയിച്ചു. പ്രതികളെ കോടതിയില്‍ ഹാജരാക്കി.