ന്യൂഡല്‍ഹി: രാജ്യത്തെ പിന്നാക്കാവസ്ഥ പരിഹരിക്കാന്‍ ഭരണഘടന മുന്നോട്ടുവച്ച സംവരണം നിര്‍ത്താലാക്കണമെന്നാവശ്യപ്പെട്ട നായര്‍ സര്‍വിസ് സൊസൈറ്റിക്കു സുപ്രിംകോടതിയില്‍ നേരിട്ടത് വന്‍ തിരിച്ചടി. കേരളത്തില്‍ സംവരണം നടപ്പാക്കിയിട്ടുപോലും സംവരണ സമുദായങ്ങള്‍ക്ക് അര്‍ഹമായ പ്രാതിനിധ്യം ലഭിച്ചിട്ടില്ല. ഈ അവസ്ഥ നിലനില്‍ക്കുമ്പോഴാണ് സംവരണം നിര്‍ത്തലാക്കണമെന്നാവശ്യപ്പെട്ട് എന്‍.എസ്.എസ് കോടതിയെ സമീപിച്ചത്. എന്നാല്‍ ഹരജി പരിഗണിക്കാന്‍ ആകില്ലെന്നു പറഞ്ഞ കോടതി ഇത് തള്ളുകയും ചെയ്തു.
എന്‍.എസ്.എസ് ജനറല്‍ സെക്രട്ടറി സുകുമാരന്‍ നായര്‍ നല്‍കിയ ഹരജിയാണ് പരിഗണിക്കാനാവില്ലെന്നു പറഞ്ഞ് കോടതി തള്ളിയത്. ഹരജിയില്‍ പ്രാഥമികവാദംപോലും കേള്‍ക്കാന്‍ കോടതി വിസമ്മതിക്കുകയായിരുന്നു.
ഹരജിക്കാര്‍ക്കു വേണ്ടി മുതിര്‍ന്ന അഭിഭാഷകരായ ഹരീഷ് സാല്‍വെയും വെങ്കട്ടരമണയും ഹാജരാവാന്‍ എത്തിയെങ്കിലും ഹരജിയില്‍ ഇടപെടാന്‍ പോലും ആവില്ലെന്ന നിലപാടാണ് ജസ്റ്റിസ് അരുണ്‍മിശ്രയുടെ ബെഞ്ച് സ്വീകരിച്ചത്. ഹരജിക്കാര്‍ക്ക് ആവശ്യമെങ്കില്‍ ഹൈക്കോടതിയെ സമീപിക്കാമെന്നും ജസ്റ്റിസ് അരുണ്‍ മിശ്ര അധ്യക്ഷനായ രണ്ടംഗബെഞ്ച് പറഞ്ഞിരുന്നു. സംവരണത്തിന് അര്‍ഹതയുള്ളവരെ കണ്ടത്തേണ്ടത് ജാതി അടിസ്ഥാനത്തില്‍ അല്ലെന്നും മറിച്ച് സാമ്പത്തിക പശ്ചാത്തലം(വര്‍ഗം) മാനദണ്ഡമാക്കിയാണ് വേണ്ടതെന്നും ആവശ്യപ്പെട്ടാണ് എന്‍.എസ്.എസ് ഹരജി നല്‍കിയത്.