പാരിസ്: വനിതാ ലോകകപ്പ് സെമിഫൈനലില്‍ ഇംഗ്ലണ്ടിനെ തകര്‍ത്തെറിഞ്ഞ് നിലവിലെ ചാംപ്യന്മാരായ അമേരിക്ക ഫൈനലില്‍ പ്രവേശിച്ചു. ഒന്നിനെതിരേ രണ്ട് ഗോളുകള്‍ക്കായിരുന്നു അമേരിക്കയുടെ ജയം.

10ാം മിനുട്ടില്‍ ക്രിസ്റ്റണ്‍ പ്രെസ്, 31ാം മിനുട്ടില്‍ അലക്‌സ് മോര്‍ഗന്‍ എന്നിവരാണ് അമേരിക്കക്ക് വേണ്ടി വല ചലിപ്പിച്ചത്. 19ാം മിനുട്ടില്‍ എലന്‍ വൈറ്റാണ് ഇംഗ്ലണ്ടിന്റെ ഏകഗോള്‍ നേടിയത്. മത്സരത്തില്‍ ഇരു ടീമുകളും മികച്ച പ്രകടനം കാഴ്ചവച്ചു. പന്ത് കൈവശം വച്ച് കളിക്കുന്നതില്‍ ഇംഗ്ലണ്ട് മുന്നിട്ടുനിന്നപ്പോള്‍ കൂടുതല്‍ ഷോട്ടുകളുതുര്‍ത്തത് അമേരിക്കയായിരുന്നു. അഞ്ചാം തവണയാണ് അമേരിക്ക വനിതാ ലോകകപ്പ് ഫൈനലിലെത്തുന്നത്. മൂന്ന് തവണയും ചാംപ്യന്മാരായി. 1991, 1999, 2015 എന്നീ വര്‍ഷങ്ങളിലാണ് അമേരിക്ക കിരീടം നേടിയത്. ഫൈനലില്‍ നെതര്‍ലന്‍ഡ് - സ്വീഡന്‍ മത്സരവിജയികളുമായി അമേരിക്ക ഏറ്റുമുട്ടും.