മഞ്ചേരി: വീട്ടില്‍ അതിക്രമിച്ച് കയറി വീട്ടമ്മയെ അപമാനിക്കാന്‍ ശ്രമിച്ച കേസില്‍ യുവാവ് അറസ്റ്റില്‍. പയ്യനാട് സ്വദേശി കള്ളന്‍ ബാബു എന്ന സൈഫുദ്ദീന്‍(38)ആണ് മഞ്ചേരി പൊലിസിന്റെ പിടിയിലായത്. മഞ്ചേരി സ്വദേശിനിയുടെ പരാതിയിലാണ് അറസ്റ്റ്.
വാതില്‍ തകര്‍ത്ത് വീട്ടില്‍ അതിക്രമിച്ചു കയറി പരാതിക്കാരിയായ വീട്ടമ്മയെ കടന്നുപിടിക്കാന്‍ ശ്രമിക്കുകയായിരുന്നു. പരാതിക്കാരി ബഹളമുണ്ടാക്കിയതോടെ പ്രതി രക്ഷപ്പെട്ടു. പിന്നീടു ലഭിച്ച പരാതിയുടെ അടിസ്ഥാനത്തിലാണ് സൈഫുദ്ദീന്‍ അറസ്റ്റിലാവുന്നത്. പുരുഷന്‍മാരില്ലാത്ത വീടുകളില്‍ രാത്രി അതിക്രമിച്ചുകയറി മോഷണം നടത്തുകയും സ്ത്രീകളെ അപമാനിക്കുകയും ചെയ്യുന്നതാണ് ഇയാളുടെ രീതിയെന്ന് പൊലിസ് പറഞ്ഞു. സമാന രീതിയിലുള്ള കേസില്‍ നേരത്തെ പിടിക്കപ്പെട്ടു ശിക്ഷയനുഭവിച്ചയാളാണ് പ്രതി. മഞ്ചേരി നഗരസഭാ പരിധിയിലെ ഒരു വീട്ടില്‍ കയറി ഉറങ്ങി കിടന്ന കുട്ടിയുടെ ഒന്നര പവന്‍ മോഷ്ടിക്കുകയും കുട്ടിയുടെ മാതാവിനെ അപമാനിക്കാന്‍ ശ്രമിക്കുകയും ചെയ്ത സംഭവത്തില്‍ ഇയാള്‍ക്കെതിരെ മഞ്ചേരി പൊലിസില്‍ കേസുണ്ട്.
സി.ഐ എന്‍.ബി ഷൈജുവിന്റെ നിര്‍ദേശപ്രകാരം എസ്.ഐ ജലീല്‍ കറുത്തേടത്ത്, ഉണ്ണികൃഷണന്‍ മാരാത്ത്, മുഹമ്മദ് സലീം ,വനിതാ സിവില്‍ പൊലിസ് ഓഫിസര്‍ ഗീത എന്നിവരടങ്ങിയ സംഘമാണ് പ്രതിയെ പിടികൂടി അന്വേഷണം നടത്തുന്നത്.