ന്യൂഡല്‍ഹി: ഡല്‍ഹിയിലെ അശോക് വിഹാറില്‍ മൂന്നുനില കെട്ടിടം തകര്‍ന്നുവീണ് നാലു കുട്ടികളും ഒരു സ്ത്രീയും മരിച്ചു. പരുക്കേറ്റ ഏഴു പേരെ ദീപ് ചന്ദ് ബന്ധു ആശുപത്രിയില്‍ പ്രവേശിപ്പിച്ചു.

മുന്നി എന്ന സ്ത്രീയാണ് മരിച്ചത്. പത്തു വയസ്സ് പ്രായം തോന്നിക്കുന്ന രണ്ടു സഹോദരന്മാര്‍, അഞ്ചു വയസ്സിനു താഴെ പ്രായം തോന്നിക്കുന്ന ഒരു ആണ്‍കുട്ടിയും സഹോദരിയുമാണ് മരിച്ചത്.

കെട്ടിടാവശിഷ്ടങ്ങള്‍ക്കിടയില്‍ ആളുകള്‍ കുടുങ്ങിക്കിടക്കുന്നതായി സംശയിക്കുന്നു. രക്ഷാപ്രവര്‍ത്തനം തുടരുകയാണ്.

രാവിലെ ഒന്‍പതരയോടെയാണ് അപകടം. ദേശീയ ദുരന്ത നിവാരണ സേനയുടെ രണ്ട് സംഘം സ്ഥലത്തെത്തിയാണ് രക്ഷാപ്രവര്‍ത്തനം നടത്തിയത്.

20 വര്‍ഷം പഴക്കമുള്ളതാണ് കെട്ടിടമെന്ന് നോര്‍ത്ത് ഡല്‍ഹി മുനിസിപ്പല്‍ കോര്‍പ്പറേഷന്‍ അധികൃതര്‍ പറഞ്ഞു. ഘടന ദുര്‍ബലമായതു കൊണ്ടാണ് തകര്‍ന്നതെന്നും അധികൃതര്‍ പറഞ്ഞു.