കണ്ണപുരം: മത്സ്യബന്ധനത്തിലേര്‍പ്പെട്ടയാളെ പുഴയില്‍ തള്ളിയിട്ടു കൊല്ലാന്‍ ശ്രമിച്ച കേസിലെ പ്രതിയെ കണ്ണപുരം പൊലിസ് കരിപ്പൂര്‍ വിമാനത്താവളത്തില്‍ നിന്നു പിടികൂടി. സംഭവത്തിനു ശേഷം ഗള്‍ഫിലേക്ക് മുങ്ങിയ കളത്തില്‍ സജീവനാ(32)ണ് ഇന്നലെ പുലര്‍ച്ചെ പിടിയിലായത്. 2008 ഡിസംബര്‍ പത്തിന് മീന്‍പിടിക്കുകയായിരുന്ന പി.പി രവീന്ദ്രനെ പുഴയില്‍ തള്ളിയിട്ടുകൊല്ലാന്‍ ശ്രമിച്ച കേസിലെ ആറാം പ്രതിയാണ് സജീവന്‍.
കേസില്‍ നേരത്തെ അഞ്ചു പ്രതികളെ അറസ്റ്റു ചെയ്തിരുന്നു. സംഭവത്തിനു ശേഷം ഗള്‍ഫിലേക്ക് മുങ്ങിയ സജീവന്‍ കഴിഞ്ഞ ദിവസമാണ് നാട്ടിലേക്ക് തിരിച്ചത്. ഇയാളെ കോടതി പിടികിട്ടാപ്പുള്ളിയായി പ്രഖ്യാപിച്ചിരുന്നു.