മാഞ്ചസ്റ്റര്‍: രണ്ടു ജയം അഞ്ചു തോല്‍വി അഞ്ചു പോയിന്റുമായി എട്ടാമത്. പറഞ്ഞുവരുന്നത് ഏകദിന ക്രിക്കറ്റിലെ കൊമ്പന്‍മാരായ ദക്ഷിണാഫ്രിക്കയെ കുറിച്ചാണ്. ഇത്തവണ കൊമ്പൊടിഞ്ഞ ദക്ഷിണാഫ്രിക്കയെയാണ് ലോകകപ്പിലുടനീളം കാണാന്‍ കഴിഞ്ഞത്. തങ്ങളുടെ ആദ്യ ലോകകപ്പ് കിരീടത്തിനായി ദക്ഷിണാഫ്രിക്കക്ക് ഇനിയും കാത്തിരിക്കണം. ഈ ടീമിനിതു എന്തുപറ്റി- എല്ലാവരും ചോദിച്ചു കാണണം.

പേരുകേട്ട ബാറ്റിങ് ബൗളിങ് നിരകള്‍ അണിനിരന്ന ദക്ഷിണാഫ്രിക്കയ്ക്ക് ലോകകപ്പിലെ ഒട്ടുമിക്ക മത്സരങ്ങളും കയ്‌പേറിയതായിരുന്നു. അതിനാല്‍ ആസ്‌ത്രേലിയക്കെതിരേയുള്ള മത്സരം ജയിച്ച് ഈ ലോകകപ്പിനോട് ഗുഡ്‌ബൈ പറയാനായിരിക്കു അവര്‍ ലക്ഷ്യമിടുന്നത്.
കംഗാരുക്കള്‍ ഇത്തവണയും അവരുടെ ശൗര്യം പുറത്തെടുത്തു. ഇത്തവണ ആറാം കിരീടത്തിലേക്ക് കണ്ണെറിയുന്ന കംഗാരുക്കളെ മെരുക്കാന്‍ ദക്ഷിണാഫ്രിക്ക നന്നേ പാടുപെടും.
വാര്‍ണറും ഫിഞ്ചും നയിക്കുന്ന ഓപ്പണിങ് കൂട്ടുകെട്ടു തന്നെ ധാരാളം ആസ്‌ത്രേലിയയ്ക്ക്. സ്റ്റാര്‍ക്ക് നയിക്കുന്ന ബൗളിങ് നിരയും അതിശക്തമാണ്. വൈകിട്ട് ആറിനാണ് മത്സരം.