ചെങ്ങന്നൂര്‍: സ്ത്രീധന പീഡന കേസില്‍ പ്രതിക്ക് ഏഴു വര്‍ഷം തടവും ഒരു ലക്ഷം രൂപ പിഴയും വിധിച്ച് ചെങ്ങന്നൂര്‍ അഡിഷണല്‍ സെഷന്‍സ് കോടതി ഉത്തരവായി.
കായംകുളം കീരിക്കാട് വേരുവള്ളിഭാഗം കാങ്കാലില്‍ കിഴക്കേതില്‍ മനോജിനെ (40) തിരേയാണ് ജഡ്ജി ഡി. സുധീര്‍ കുമാറിന്റെ വിധി. മുളക്കുഴ കോയിപ്രത്ത് മലയില്‍ വീട്ടില്‍ വാടകയ്ക്ക് താമസിക്കുന്ന ആനന്ദന്‍-ലീലാമ്മ ദമ്പതികളുടെ മകള്‍ ആശ ഭര്‍ത്താവ് മനോജിന്റെ വീട്ടിലെ കിടപ്പുമുറിയില്‍ ഫാനില്‍ തൂങ്ങി മരിച്ചിരുന്നു. തുടര്‍ന്ന് മാതാവ് ലീലാമ്മ നല്‍കിയ പരാതിയില്‍ എടുത്ത കേസിലാണ് വിധി.
വിവാഹ സമയത്ത് സ്ത്രീധനമായി മനോജിന്റെ വീട്ടുകാര്‍ ആവശ്യപ്പെട്ട രണ്ടു ലക്ഷം രൂപയില്‍ ബാക്കി 40,000 ആവശ്യപ്പെട്ട് മാനസികമായി പീഡിപ്പിച്ചിരുന്നെന്നും,ആശയുടെ മരണത്തിനു രണ്ടു ദിവസം മുന്‍പ് തുക ആവശ്യപ്പെട്ടെന്നും തുടര്‍ന്ന് താന്‍ ആത്മഹത്യ ചെയ്യാന്‍ പോകുകയാണെന്ന് ആശ പറഞ്ഞാതും മാതാവ് മൊഴി നല്‍കിയിരുന്നു.
പ്രോസിക്യൂഷന്‍ സാക്ഷികളായി അയല്‍ക്കരടക്കം 22 പേരെ വിസ്തരിച്ചു. കേസ് നടക്കുന്നതിനിടയില്‍ ആശയുടെ പിതാവ് ആനന്ദന്‍ മരിച്ചിരുന്നു.
രണ്ടാംപ്രതി മനോജിന്റെ മാതാവിനെ കുറ്റക്കാരിയല്ല എന്നുകണ്ട് കോടതി വെറുതെ വിട്ടു.
പിഴത്തുക ലീലാമ്മയ്ക്ക് നല്‍കാനും ഉത്തരവായി.