വണ്ടൂര്‍: വാണിയമ്പലം ത്രിപുര സുന്ദരീ ദേവീ ക്ഷേത്രത്തില്‍നിന്നു കാണാതായ നാഗവിഗ്രഹം കണ്ടെടുത്തു. ക്ഷേത്രത്തില്‍ അതിക്രമം നടന്നു നാലു മാസങ്ങള്‍ക്കു ശേഷമാണ് വിഗ്രഹം ക്ഷേത്രക്കിണറ്റില്‍നിന്നു കണ്ടെത്തിയത്.
ക്ഷേത്ര കോവിലിന്റെ അകത്തുള്ള കിണറിലെ വെള്ളം വറ്റിച്ചു നടത്തിയ പരിശോധനയിലാണ് കരിങ്കല്ലില്‍തീര്‍ത്ത വിഗ്രഹം കണ്ടെടുത്തത്. കഴിഞ്ഞ ജനുവരി 20നു ക്ഷേത്രത്തില്‍ നടന്ന സാമൂഹ്യവിരുദ്ധരുടെ അതിക്രമത്തെ തുടര്‍ന്നാണ് വിഗ്രഹം കാണാതായിരുന്നത്. അന്നു നഷ്ടമായിരുന്ന കംപ്യൂട്ടര്‍ പ്രിന്റര്‍, കീബോര്‍ഡ് എന്നിവ ഇതേ കിണറ്റില്‍നിന്നു കണ്ടെത്തിയിരുന്നു. വിഗ്രഹവും കിണറ്റിലുണ്ടാകാമെന്ന നിഗമനത്തില്‍ പരിശോധിക്കാന്‍ ശ്രമിച്ചിരുന്നെങ്കിലും  കിണറ്റില്‍ കൂടുതല്‍ വെള്ളമുണ്ടായിരുന്നതിനാല്‍ ശ്രമം ഉപേക്ഷിക്കുകയായിരുന്നു. ഇപ്പോള്‍ വെള്ളം കുറഞ്ഞതോടെയാണ് കിണര്‍ വൃത്തിയാക്കാന്‍ വെള്ളം വറ്റിച്ചത്. നാഗവിഗ്രഹത്തോടൊപ്പം ഒരു വാതില്‍ പൂട്ടും കിണറ്റില്‍നിന്നു ലഭിച്ചിട്ടുണ്ട്. തുടര്‍ന്നു വണ്ടൂര്‍ അഡീഷണല്‍ എസ്.ഐ കെ.ടി റോയിയുടെ നേതൃത്വത്തില്‍ പൊലിസും രഹസ്യാന്വേഷണ വിഭാഗം ഉദ്യോഗസ്ഥരും സ്ഥലത്തെത്തി. ശേഷം ശുദ്ധികലശം നടത്തി പുനഃപ്രതിഷ്ഠക്കായി വിഗ്രഹം ക്ഷേത്ര ഭാരവാഹികള്‍ക്കു തിരിച്ചുനല്‍കിയിട്ടുണ്ട്.