റിയാദ്: പുതിയ ഭീഷണികളെ നേരിടാന്‍ അമേരിക്ക പശ്ചിമേഷ്യയില്‍ സംവിധാനിച്ചിരുന്ന മിസൈല്‍ പ്രതിരോധ സംവിധാനങ്ങള്‍ നവീകരിക്കുന്നു. നേരത്തെ സജ്ജമാക്കിയ നാലിടങ്ങളിലെ മിസൈല്‍ പ്രതിരോധ സംവിധാനങ്ങള്‍ അവിടെനിന്നു മാറ്റി പുതിയ കേന്ദ്രങ്ങളില്‍ സ്ഥാപിക്കാനാണ് ശ്രമം.

അമേരിക്കന്‍ ഉദ്യോഗസ്ഥരെ ഉദ്ധരിച്ചു വാള്‍സ്ട്രീറ്റ് ജേണലാണ് വാര്‍ത്ത ആദ്യം പുറത്തുവിട്ടത്. ഇറാനു പുറമേ റഷ്യ, ചൈന എന്നിവിടങ്ങളില്‍നിന്നുള്ള ഭീഷണികളെ മറികടക്കാനാണ് പുതിയ നീക്കമെന്നാണ് റിപ്പോര്‍ട്ട്. അറബ് മേഖലയില്‍ നേരത്തെ തയാറാക്കിയിരുന്ന നാലു മിസൈല്‍ പ്രതിരോധ സംവിധാനങ്ങളാണ് പിന്‍വലിക്കുന്നത്. കുവൈത്തിലെ രണ്ടും ജോര്‍ദാന്‍, ബഹ്‌റൈന്‍ എന്നിവിടങ്ങളിലെ ഓരോന്നുമാണ് പിന്‍വലിക്കുക. മിസൈല്‍ പ്രതിരോധ സംവിധാനമായ അമേരിക്കന്‍ പാട്രിയറ്റ് മിസൈലുകളാണ് പിന്‍വലിക്കുന്നത്. എന്നാല്‍, ഇത് ഏതു ഭാഗത്തേക്കാണ് പുതുതായി സംവിധാനിക്കുന്നതെന്നതടക്കമുള്ള കൂടുതല്‍ വിവരങ്ങള്‍ വ്യക്തമല്ല.
ഇവിടങ്ങളില്‍നിന്നു മാറ്റുന്ന മിസൈല്‍ പ്രതിരോധ സംവിധാനങ്ങള്‍ നവീകരണത്തിനു ശേഷമായിരിക്കും പുതിയ കേന്ദ്രങ്ങളില്‍ സ്ഥാപിക്കുക. ഈ രാജ്യങ്ങള്‍ക്കു പുറമേ സഊദിയിലും അമേരിക്കയുടെ പാട്രിയറ്റ് മിസൈല്‍ സംവിധാനം സ്ഥാപിച്ചിട്ടുണ്ട്. സിറിയന്‍ പ്രതിസന്ധിയെ തുടര്‍ന്നു റഷ്യയുമായി ഇടഞ്ഞുനില്‍ക്കുന്ന അമേരിക്ക ചൈനയുമായും അകല്‍ച്ചയിലാണ്. ഈ ഭീഷണികളെ മറികടക്കാനാണ് പുതിയ നീക്കമെന്നാണ് വിലയിരുത്തപ്പെടുന്നത്.