ശാസ്താംകോട്ട: കോണ്‍ഗ്രസ് മണ്ഡലം സെക്രട്ടറിയെ സി.പി.എം അഭിഭാഷകന്റെ നേതൃത്വത്തില്‍ ക്രൂരമായി മര്‍ദിക്കുകയും സംഭവം മൊബൈല്‍ ഫോണില്‍ പകര്‍ത്തിയ ഭാര്യയെ അപമാനിക്കാന്‍ ശ്രമിക്കുകയും ചെയ്തതായി പരാതി. ശൂരനാട് വടക്ക് മണ്ഡലം സെക്രട്ടറി പടിഞ്ഞാറ്റ കിഴക്ക്മുറി ഇയ്യാനം തടത്തില്‍വിള പുത്തന്‍വീട്ടില്‍ സാംസനാ(38)ണ് മര്‍ദനമേറ്റത്. സാരമായി പരുക്കേറ്റ ഇദ്ദേഹത്തെ ശാസ്താംകോട്ട താലൂക്കാശുപത്രിയില്‍ പ്രവേശിപ്പിച്ചു. ശൂരനാട് വടക്ക് പടിഞ്ഞാറ്റകിഴക്ക് മുറിയില്‍ പ്ലാവിളയില്‍ വീട്ടില്‍ ജോയി, ശാസ്താംകോട്ട ബാറിലെ അഭിഭാഷകനും സി.പി.എം നേതാവുമായ ദി നെസ്റ്റ് ഹൗസില്‍ സി.കെ വിജയാനന്ദ്, പ്ലാവിള പുത്തന്‍വീട്ടില്‍ ബേബിക്കുട്ടി ഉള്‍പ്പെടെ കണ്ടാലറിയാവുന്ന അന്‍പതോളം പേര്‍ക്കെതിരെ പൊലിസില്‍ പരാതി നല്‍കി. വസ്തു തര്‍ക്കവുമായി ബന്ധപ്പെട്ടാണ് ആക്രമണമെന്ന് കരുതുന്നു. അതിനിടെ  രാഷ്ട്രീയ  സമ്മര്‍ദത്തിനു വഴങ്ങി പൊലിസ് ആശുപത്രിയിലെത്തി മൊഴി രേഖപ്പെടുത്തിയില്ലെന്ന്  ആരോപണമുണ്ട്.