കോഴിക്കോട്: സ്വകാര്യ ബസിനടിയില്‍പ്പെട്ട് ബൈക്ക് യാത്രികന്‍ മരിച്ചു. പെരുവണ്ണാമൂഴി ചെമ്പനോട് പന്നിക്കോട്ടൂര്‍ ഹരിജന്‍ കോളനിയിലെ കേളോത്ത് ചാലില്‍ മിഥുന്‍ വിജയന്‍ (23)ആണ് മരിച്ചത്.
ഇന്നലെ രാവിലെ ഒന്‍പതോടെ നടക്കാവ് ജുമുഅത്ത് പള്ളിക്കു സമീപത്തു വെച്ചാണ് അപകടമുണ്ടായത്.
വീതി കുറഞ്ഞ റോഡില്‍ നിര്‍ത്തിയിട്ട ബൈക്കില്‍ കയറാന്‍ ശ്രമിക്കുന്നതിനിടെ എരഞ്ഞിപ്പാലം ഭാഗത്തേക്കു പോകുകയായിരുന്ന സിറ്റി ബസിടിച്ച് ടയറിനടിയില്‍ പെടുകയായിരുന്നു.
തലയ്ക്കും വാരിയെല്ലിനും സാരമായി പരുക്കേറ്റ മിഥുനെ ഉടന്‍ തൊട്ടടുത്ത സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഊരാളുങ്കല്‍ ലേബര്‍ കോണ്‍ട്രാക്ട് കോപ്പറേറ്റീവ് സൊസൈറ്റിയിലെ സര്‍വേ വിഭാഗത്തില്‍ ട്രെയിനിയായ മിഥുന്‍ ജോലി സ്ഥലത്തേക്കു പോകുന്നതിനിടെയാണ് അപകടമുണ്ടായത്.
ബസ് ഡ്രൈവര്‍ക്കെതിരേ ട്രാഫിക് പൊലിസ് കേസെടുത്തു. ഡിവൈ.എഫ.്‌ഐ പന്നിക്കോട്ടൂര്‍ യൂനിറ്റംഗമായ മിഥുന്‍ വിജയന്റേയും മാലതിയുടേയും മകനാണ്.
ഹരിക്കുട്ടനാണ് സഹോദരന്‍. മൃതദേഹം പോസ്റ്റുമോര്‍ട്ടത്തിനു ശേഷം വീട്ടുവളപ്പില്‍ സംസ്‌കരിച്ചു.