കോഡൂര്‍: ഗ്രാമപഞ്ചായത്ത്  പതിനാലാം വാര്‍ഡ് ഒറ്റത്തറയില്‍ മഴക്കാലപൂര്‍വ ശുചീകരണം നടത്തി. ചെമ്മങ്കടവ്  പി.എം.എസ്.എ.എം.എ ഹയര്‍സെക്കന്‍ഡറി സ്‌കൂളിലെ എന്‍.എസ്.എസ് വളണ്ടിയര്‍മാരാണ് അവര്‍  ദത്തെടുത്ത ഗ്രാമമായ ഒറ്റത്തറയില്‍ ശുചീകരണ പ്രവര്‍ത്തനങ്ങള്‍ നടത്തിയത്. വെള്ളത്തില്‍ നിന്ന് കൊതുക് വളരാന്‍  സാധ്യതയുള്ള സ്ഥലങ്ങളിലെ അജൈവമാലിന്യങ്ങള്‍ വിദ്യാര്‍ഥികള്‍ നീക്കം ചെയ്തു.
ശുചീകരണ  പ്രവര്‍ത്തനങ്ങള്‍ പഞ്ചായത്തംഗം മച്ചിങ്ങല്‍ മുഹമ്മദ് ഉദ്ഘാടനം ചെയ്തു. എന്‍.എസ്.എസ് യൂനിറ്റ്  പ്രോഗ്രാം ഓഫിസര്‍ എന്‍.കെ അഫ്‌സല്‍ റഹ്മാന്‍ മഴക്കാല രോഗങ്ങളും പകര്‍ച്ചവ്യാധികളും  എന്നവിഷയത്തില്‍ പൊതുജനങ്ങള്‍ക്കും വിദ്യാര്‍ഥികള്‍ക്കും ബോധവല്‍ക്കരണ ക്ലാസെടുത്തു.
യൂനിറ്റ് ലീഡര്‍മാരായ എ.കെ. മുഹമ്മദ് ഷബീര്‍,  ഫാത്തിമ ഷെറിന്‍ ശഹാന, ഷബീറലി ഉമ്മത്തൂര്‍  എന്നിവര്‍ ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കി.