ലണ്ടന്‍: ഏതാനും ദിവസം മുമ്പ് കൗണ്ടി ഡര്‍ബിയോടേറ്റ പരജയത്തിന്റെ ക്ഷീണം മാറും മുമ്പ് മാഞ്ചസ്റ്റര്‍ യുനൈറ്റഡിന് വീണ്ടും തോല്‍വി. ഇംഗ്ലീഷ് പ്രീമിയര്‍ ലീഗില്‍ വെസ്റ്റ് ഹാമിനോടാണ് 3-1 എന്ന സ്‌കോറിന് യുനൈറ്റഡ് പരാജയപ്പെട്ടത്. യുനൈറ്റഡിന്റെ ലീഗ് ചരിത്രത്തിലെ ഏറ്റവും മോശം തുടക്കമായിരിക്കാം ഈ സീസണിലേത്.
ഡേവിഡ് മോയ്‌സ് പരിശീലകനായിരുന്നപ്പോഴായിരുന്നു ഇതിന് മുമ്പ് മാഞ്ചസ്റ്ററിന് ഇതുപോലത്തെ മോശം തുടക്കമുണ്ടായിരുന്നത്. പ്രീമിയര്‍ ലീഗില്‍ ഏഴ് മത്സരം കളിച്ച യുനൈറ്റഡ് മൂന്ന് മത്സരത്തില്‍ മാത്രമാണ് ജയിച്ചത്. ഒരു മത്സരം സമനിലയില്‍ കലാശിച്ചു. ബാക്കി മൂന്ന് മത്സരത്തിലും പരാജയമായിരുന്നു. ഏഴ് മത്സരങ്ങളില്‍ നിന്ന് 10 പോയിന്റുമായി പത്താം സ്ഥാനത്താണ് യുനൈറ്റഡുള്ളത്. ഏറ്റവും മോശം ഫോമിലുള്ള ടീമുമായി എങ്ങനെ ഇനി പ്രീമിയര്‍ ലീഗില്‍ മുന്നോട്ട് പോകുമെന്നറിയാതെ കുഴങ്ങുകയാണ് മൗറീഞ്ഞോ.
മറ്റൊരു മത്സരത്തില്‍ എതിരില്ലാത്ത രണ്ട് ഗോളുകള്‍ ടോട്ടനം ഹഡേഴ്‌സ് ഫീല്‍ഡിനെ തോല്‍പ്പിച്ചു. ഇംഗ്ലീഷ് താരം ഹാരി കെയിനിന്റ വകയായിരുന്നു രണ്ട് ഗോളും. 25, 34 മിനുട്ടുകളില്‍ പെനാല്‍റ്റിയില്‍ നിന്നായിരുന്നു കെയിന്റെ ഗോള്‍. ആഴ്‌സനല്‍ എതിരില്ലാത്ത രണ്ട് ഗോളുകള്‍ക്ക് വാട്‌ഫോര്‍ഡിനെ പരാജയപ്പെടുത്തി. ക്രെയിഗിന്‍ കത്കാര്‍ട്ട്, മെസുട്ട് ഓസില്‍ എന്നിവരാണ് ആഴ്‌സനലിന് വേണ്ടി ഗോള്‍ നേടിയത്. എതിരില്ലാത്ത രണ്ട് ഗോളുകള്‍ മാഞ്ചസ്റ്റര്‍ സിറ്റി ബ്രൈട്ടനെ പരാജയപ്പെടുത്തി.
റഹീം സ്റ്റര്‍ലിങ് (29), സെര്‍ജിയോ അഗ്യൂറോ (65) എന്നിവര്‍ സിറ്റിക്കായി ഗോളുകള്‍ സ്വന്തമാക്കി. 2-0 എന്ന സ്‌കോറിന് ലെയ്‌സസ്റ്റര്‍ സിറ്റി ന്യൂകാസില്‍ യുനൈറ്റഡിനെ പരാജയപ്പെടുത്തി. എതിരില്ലാത്ത രണ്ട് ഗോളുകള്‍ക്ക് വോല്‍വ്‌സ് സതാംപ്ടനെ പരാജയപ്പെടുത്തി.