മാലെ: മാലദ്വീപ് പൊതു തെരഞ്ഞെടുപ്പില്‍ ഞെട്ടിപ്പിക്കുന്ന പ്രകടനം കാഴ്ചവച്ച പ്രതിപക്ഷ നേതാവ് ഇബ്രാഹീം മുഹമ്മദ് സാലിഹിനെ വിജയിയായി പ്രഖ്യാപിച്ചു. മാലദ്വീപ് തെരഞ്ഞെടുപ്പ് കമ്മിഷന്‍ തലവന്‍ അഹ്മദ് ശരീഫ് ആണ് പ്രഖ്യാപനം നടത്തിയത്.
നിലവിലെ പ്രസിഡന്റ് അബ്ദുല്ല യമീനിനു ശക്തമായ തിരിച്ചടി നേരിട്ട തെരഞ്ഞെടുപ്പില്‍ അന്തിമഫലം പുറത്തുവിടുന്നത് നീട്ടിവയ്ക്കാന്‍ കമ്മിഷനുമേല്‍ കടുത്ത സമ്മര്‍ദമുണ്ടായിരുന്നു. കഴിഞ്ഞയാഴ്ച നടന്ന തെരഞ്ഞെടുപ്പില്‍ 58.4 ശതമാനം വോട്ടുനേടിയാണ് ഇബ്രാഹീം സാലിഹ് വിജയിച്ചത്. ആദ്യഘട്ടഫലം കഴിഞ്ഞ തിങ്കളാഴ്ച പുറത്തുവന്നിരുന്നു. എന്നാല്‍, ഫലപ്രഖ്യാപനത്തില്‍ ക്രമക്കേട് ആരോപിച്ച് അബ്ദുല്ല യമീനും പാര്‍ട്ടിയും രംഗത്തെത്തിയതോടെ അന്തിമഫല പ്രഖ്യാപനം നീളുകയായിരുന്നു.