തിരുവനന്തപുരം: ഗള്‍ഫിലേക്ക് സ്ത്രീകളെ റിക്രൂട്ട് ചെയ്യുന്ന കോഴിക്കോടുള്ള റോളക്‌സ് ഏജന്‍സിക്കെതിരായ പരാതി പരിശോധിച്ച് നടപടിയെടുക്കുമെന്ന് മുഖ്യമന്ത്രി പിണറായി വിജയന്‍. ഏജന്‍സി റിക്രൂട്ട് ചെയ്തു റിയാദിലേക്ക് അയച്ച വയനാട് സ്വദേശിനി സിസിലി മൈക്കളിന്റെ മരണവുമായി ബന്ധപ്പെട്ട് സി.കെ. ശശീന്ദ്രന്റെ സബ്മിഷന് മറുപടി നല്‍കുകയായിരുന്നു മുഖ്യമന്ത്രി.
റോളക്‌സ് ഏജന്‍സിയുടെ മുംബൈ ഓഫീസ് വഴിയാണ് സിസിലി ജോലിക്ക് പോയത്. ജോലി സ്ഥലത്ത് സിസിലിക്ക് നേരിട്ട പീഡനം സംബന്ധിച്ച് മാതാവ് മുഖ്യമന്ത്രിക്ക് പരാതി നല്‍കിയിരുന്നു. ഇതുപ്രകാരം കഴിഞ്ഞ ഏപ്രില്‍ 28ന് റിയാദിലെ ഇന്ത്യന്‍ എംബസിക്കും കേന്ദ്രവിദേശകാര്യ മന്ത്രാലയത്തിനും പരാതി നല്‍കി. എന്നാല്‍, ഏപ്രില്‍ 24ന് സിസിലി മരിച്ചുവെന്നും മൃതദേഹം നാട്ടിലെത്തിക്കാന്‍ നടപടി വേണമെന്നും ചൂണ്ടിക്കാട്ടി ഒ.ആര്‍ കേളു എം.എല്‍.എ 28ന് കത്തുനല്‍കിയിരുന്നു.
ഈ കത്ത് റിയാദിലെ ഇന്ത്യന്‍ എംബസിക്കും കേന്ദ്രവിദേശകാര്യ മന്ത്രാലയത്തിനും കൈമാറി. മൃതദേഹം നടപടിക്രമങ്ങള്‍ പൂര്‍ത്തിയാക്കി നാട്ടിലെത്തിക്കാമെന്ന് എംബസി കഴിഞ്ഞ ഒന്നിനു അറിയിക്കുകയും 14ന് നാട്ടിലെത്തിക്കുകയും ചെയ്തു.  മരണത്തില്‍ ദുരൂഹതയുണ്ടെന്ന് ചൂണ്ടിക്കാട്ടി സിസിലിയുടെ സഹോദരനായ ജോണ്‍സണ്‍ മൈക്കിള്‍ നല്‍കിയ പരാതിയില്‍ കുമ്പളക്കാട് പൊലിസ് കേസെടുത്ത് അന്വേഷണം നടത്തുകയാണ്.
സിസിലിക്ക് സമാനമായി പീഡനം നേരിടുന്ന ജയന്തി, സലീന എന്നിവരുടെ കാര്യത്തില്‍ പരാതി ലഭിച്ചിട്ടില്ല. ഇവരുടെ കാര്യത്തില്‍ സര്‍ക്കാര്‍ ആവശ്യമായ നടപടിയെടുക്കും. അതേസമയം, റോളക്‌സ് ഏജന്‍സിക്കെതിരേ പരാതിയില്ലാത്തതിനാല്‍ കേസെടുക്കാന്‍ കഴിഞ്ഞിട്ടില്ല. എം.എല്‍.എയുടെ ഭാഗത്തുനിന്നുണ്ടായ പരാതി പരിശോധിച്ച് നടപടിയെടുക്കുമെന്നും മുഖ്യമന്ത്രി പറഞ്ഞു.