കോഴിക്കോട്: സംസ്ഥാനം ഇതുവരെ കണ്ടിട്ടില്ലാത്തതരത്തിലുള്ള വിശ്വാസത്തകര്‍ച്ചയാണ് സര്‍ക്കാര്‍ നേരിടുന്നതെന്ന് മുസ്‌ലിംലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി. ഈ സര്‍ക്കാരിന്റെ കാലത്ത് ഭരണസംവിധാനം വലിയതോതില്‍ ദുരുപയോഗം ചെയ്യപ്പെട്ടുവെന്നും കാലിക്കറ്റ് പ്രസ്‌ക്ലബ്ബിന്റെ മീറ്റ് ദ ലീഡര്‍ പരിപാടിയില്‍ അദ്ദേഹം പറഞ്ഞു.

   നിയമവാഴ്ച ഉറപ്പാക്കുന്നതില്‍ സര്‍ക്കാര്‍ പരാജയപ്പെട്ടു. പണസമ്പാദനം ലക്ഷ്യംവച്ച് എന്തും ചെയ്യാമെന്നാണ് അവസ്ഥ. ഒന്നും പിടിക്കപ്പെടില്ലെന്നാണ് ഇതിനുപിന്നില്‍ പ്രവര്‍ത്തിച്ചവര്‍ കരുതിയത്. സംസ്ഥാനത്ത് ഇനിയൊരിക്കലും സി.പി.എം അധികാരത്തില്‍ വരില്ല. തദ്ദേശ തെരഞ്ഞെടുപ്പില്‍ യു.ഡി.എഫ് വ്യക്തമായ മേല്‍ക്കൈ നേടും. നിയമസഭാ തെരഞ്ഞെടുപ്പിലും അത് ആവര്‍ത്തിക്കും. ജനങ്ങളോടുള്ള കടമ നിര്‍വഹിക്കുന്നതില്‍ യു.ഡി.എഫ് ഒരിക്കലും പിന്നോട്ടുപോയിട്ടില്ലെന്നും അദ്ദേഹം പറഞ്ഞു. 

മുസ്‌ലിംലീഗ് സംസ്ഥാന സെക്രട്ടറി കെ.എം ഷാജിക്കെതിരായ കേസ് ആരെയും ഞെട്ടിക്കുന്ന ഒന്നല്ലെന്ന് ചോദ്യത്തിന് മറുപടിയായി അദ്ദേഹം പറഞ്ഞു. തെരഞ്ഞെടുപ്പ് ചെലവ് സംബന്ധിച്ച കേസാണ് എന്‍ഫോഴ്‌സ്‌മെന്റ് ഡയരക്ടറേറ്റിന്റേത്. കണക്കു വിശദീകരിച്ചാല്‍ അത് കഴിഞ്ഞു. അതിന് ഷാജിക്ക് സാധിക്കും. വീട് നിര്‍മിച്ചപ്പോള്‍ ഒരു മൂല അധികം നീണ്ടുപോയി എന്നാണ് കോര്‍പറേഷനിലെ കേസ്. ഇതും തീര്‍ക്കാവുന്നതേയുള്ളൂവെന്നും അദ്ദേഹം പറഞ്ഞു.