കളമശ്ശേരി: ഓരോ നിമിഷത്തെയും നന്‍മകൊണ്ട് അടയാളപ്പെടുത്തുകയാണ് റമദാനെന്നും സമൂഹത്തില്‍ പ്രായോഗികമായ സുകൃതങ്ങളെയും മൂല്യങ്ങളെയും നിര്‍വഹിക്കുകയാണ് ഖുര്‍ആനിന്റെ ധര്‍മമെന്നും പാണക്കാട് സയ്യിദ് അബ്ബാസലി ശിഹാബ് തങ്ങള്‍ പറഞ്ഞു.  
'ഖുര്‍ആന്‍ സുകൃതങ്ങളുടെ വചനപ്പൊരുള്‍' എന്ന പ്രമേയത്തില്‍ എസ്.കെ.എസ്.എസ്.എഫ് നടത്തുന്ന റമദാന്‍ കാംപയിനിന്റെ ഭാഗമായി കുവൈറ്റ് ഇസ്‌ലാമിക് കൗണ്‍സിലിന്റെ സഹായത്തോടെയുള്ള റിലീഫിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു തങ്ങള്‍.
ചടങ്ങില്‍ വി.കെ ഇബ്രാഹിംകുഞ്ഞ് എം.എല്‍.എ പങ്കെടുത്തു. കളമശ്ശേരി പി.ഡബ്ല്യു.ഡി റസ്റ്റ് ഹൗസ് ഓഡിറ്റോറിയത്തില്‍ നടന്ന സംഗമത്തില്‍ റമദാന്‍ കാംപയിന്‍ ഉദ്ഘാടനവും മദീന പാഷന്‍ അവാര്‍ഡ് ദാനവും എസ്.കെ.എസ്.എസ്.എഫ് ജില്ലാ പ്രസിഡന്റ് സയ്യിദ് ഷെഫീഖ് തങ്ങള്‍ നിര്‍വഹിച്ചു.
ജില്ലാ വൈസ് പ്രസിഡന്റ് അബ്ദുള്‍ വഹാബ് ദാരിമി അധ്യക്ഷത വഹിച്ചു. അബ്ദുള്‍ ഖാദര്‍ ഹുദവി, സിയാദ് ഫൈസി, ഷാജഹാന്‍ അല്‍ഖാസിമി, എ.പി ഇബ്രാഹിം, സെയ്തുഹാജി, സിദ്ദീഖ് കുഴിവേലിപ്പടി, ജിയാദ് നെട്ടൂര്‍, സിദ്ദീഖ് ചിറപ്പാട്ട്, ജാഫര്‍ കുന്നുകര, പി.എച്ച് അജാസ്, നൗഫല്‍ തീനാടന്‍, മുഹമ്മദ് സാദിഖ് തുടങ്ങിയവര്‍ പ്രസംഗിച്ചു. ജില്ലാ ജനറല്‍ സെക്രട്ടറി പി.എം ഫൈസല്‍ സ്വാഗതവും വര്‍ക്കിങ് സെക്രട്ടറി കെ.കെ അബ്ദുള്ള നന്ദിയും പറഞ്ഞു.