ഫൈനലില്‍ 6-2, 6-2 ന് സെറീന വില്യംസിനെ പരാജയപ്പെടുത്തി

ലണ്ടന്‍: അമേരിക്കന്‍ താരം സെറീന വില്യംസിനെ തരിപ്പണമാക്കി റൊമേനിയന്‍ താരം സിമോണ ഹാലെപ് ആദ്യ വിംബിള്‍ഡന്‍ കിരീടം സ്വന്തമാക്കി. ഇന്നലെ നടന്ന മത്സരത്തില്‍ ഏകപക്ഷീയമായ പോരാട്ടത്തിനൊടുവില്‍ ആധികാരികമായിട്ടായിരുന്നു ഹാലെപ്പിന്റെ ജയം. ഇതോടെ വനിതാ കിരീടം നേടുന്ന ആദ്യ റൊമേനിയന്‍ താരമാകാനും ഹാലെപ്പിന് കഴിഞ്ഞു. 6-2, 6-2 എന്ന സ്‌കോറിനായിരുന്നു സെറീനയുടെ തോല്‍വി.
സെറീനയ്ക്ക് ഒന്ന് പൊരുതാന്‍ പോലും ഹാലെപ് അവസരം നല്‍കിയില്ല. കിരീട ഫേവറിറ്റായിരുന്ന സെറീനക്ക് തുടക്കം മുതല്‍ തിരിച്ചടി നേരിട്ടു. ഇതോടെ ഹാലെപ്പ് മത്സരം കൈയിലെടുക്കുകയായിരുന്നു. സെറീന അനായാസം കിരീടം നേടുമെന്നായിരന്നു പ്രവചിക്കപ്പെട്ടിരുന്നത്. പക്ഷേ അതൊന്നും ഹാലെപിന് മുന്നില്‍ വിലപ്പോയില്ല. ഇതോടെ അവസാനമായി കളിച്ച മൂന്ന് മത്സരത്തിലും സെറീന തോല്‍വി രുചിച്ചു. ഹാലെപ്പിന്റെ വേഗമേറിയ നീക്കത്തില്‍ സെറീന പതറിയതായിരുന്നു തോല്‍വിക്ക് കാരണമായത്. ഇതോടെ 23 ഗ്രാന്‍ഡ് സ്ലാം എന്ന നേട്ടം സ്വന്തമാക്കാനാകാതെ സെറീന മടങ്ങി. എന്നാല്‍ ഈ ചരിത്രനേട്ടത്തെ മറികടക്കുന്ന പ്രകടനമാണ് ഹാലെപ് നടത്തിയത്. മികച്ച പോരാട്ടത്തിനൊടുവില്‍ ഫ്രഞ്ച് ഓപ്പണിലും ഹാലെപ്പ് കിരീടം സ്വന്തമാക്കിയിരുന്നു.
പുരുഷ ഫൈനല്‍ ഇന്ന്
ലണ്ടന്‍: വിംബിള്‍ഡനിന്റെ പുരുഷന്‍മാരുടെ കിരീടപ്പോരാട്ടം ഇന്ന് നടക്കും. വൈകിട്ട് 6.30ന് നടക്കുന്ന മത്സരത്തില്‍ സ്വിസ് താരം റോജര്‍ ഫെഡററും സെര്‍ബിയന്‍ താരം നോവക് ദ്യോകോവിച്ചും തമ്മിലാണ് ഏറ്റുമുട്ടുന്നത്. സെമി ഫൈനലില്‍ സ്പാനിഷ് താരം റാഫേല്‍ നദാലിനെ പരാജയപ്പെടുത്തിയാണ് റോജര്‍ ഫെഡറര്‍ ഫൈനലില്‍ പ്രവേശിച്ചത്. മറ്റൊരു സെമിയില്‍ ദ്യോകോവിച്ച് സ്പാനിഷ് താരം ബാറ്റിസ്റ്റ അഗട്ടിനേയാണ് പരാജയപ്പെടുത്തിയത്.