തിരുവനന്തപുരം: പ്രളയക്കെടുതിയെ തുടര്‍ന്ന് സംസ്ഥാനത്തെ മൃഗശാലകളുടെ ഓണവരുമാനത്തില്‍ ലക്ഷങ്ങളുടെ ഏറ്റക്കുറച്ചിലുകള്‍. പ്രളയക്കെടുതിയില്‍പെടാത്ത തലസ്ഥാനത്തെ മൃഗശാലയുടെയും മ്യൂസിയത്തിന്റെയും ഓണവരുമാനം രണ്ടുലക്ഷം കൂടിയപ്പോള്‍ പ്രളയക്കെടുതി നേരിട്ട തൃശൂരില്‍ വരുമാനം എട്ടുലക്ഷം കുറഞ്ഞു.
ടിക്കറ്റ് നിരക്കില്‍ നേരീയ വര്‍ധന ഉണ്ടായിരുന്നുവെങ്കിലും തിരുവനന്തപുരത്ത് ഇക്കുറി മുന്‍വര്‍ഷങ്ങളിലുള്ളതിനേക്കാള്‍ സന്ദര്‍ശകരുടെ തിരക്ക് അനുഭവപ്പെട്ടുവെന്ന് അധികൃതര്‍ പറഞ്ഞു. സാധാരണ മ്യൂസിയം, മൃഗശാല തിങ്കളാഴ്ച്ച അവധി ദിനമാണ്. എന്നാല്‍ ഓണക്കാലമായതിനാല്‍ കഴിഞ്ഞ 27ന് തുറന്നു പ്രവര്‍ത്തിച്ചു. അന്നു മാത്രം മൂന്നു ലക്ഷം രൂപ ലഭിച്ചു. ഇതില്‍ രണ്ടു ലക്ഷം രൂപ മൃഗശാല വരുമാനമാണ്. കഴിഞ്ഞ വര്‍ഷം അവിട്ടം ദിനത്തില്‍ മൂന്നുലക്ഷത്തിലധികം ലഭിച്ചുവെങ്കില്‍ ഇത്തവണ അത് നാല് ലക്ഷത്തി മുപ്പത്തിരണ്ടായിരം രൂപയായി. കഴിഞ്ഞ വര്‍ഷം ഓണക്കാലത്തെ പത്തു ദിവസത്തില്‍ 24.41 ലക്ഷം രൂപയായിരുന്നു ലഭിച്ചത്. ഈ വര്‍ഷം 22 മുതല്‍ 30 വരെ തന്നെ 26.23 ലക്ഷം രൂപ ലഭിച്ചു.
കഴിഞ്ഞ വര്‍ഷം പന്ത്രണ്ട് ലക്ഷത്തോളം രൂപയായിരുന്നു തൃശൂര്‍ മൃഗശാലയിലും മ്യൂസിയത്തും നിന്നു ലഭിച്ചത്. എന്നാല്‍ ഈ വര്‍ഷം അത് നാലു ലക്ഷത്തോളമായി കുറഞ്ഞു. പ്രളയക്കെടുതിയെ തുടര്‍ന്ന് ഓണം നാളുകളില്‍ സന്ദര്‍ശകരുടെ എണ്ണം വളരെ കുറവായിരുന്നുവെന്ന് മൃഗശാല അധികൃതര്‍ പറയുന്നു. സംസ്ഥാന മ്യൂസിയം മൃഗശാലാ വകുപ്പിന്റെ കീഴിലുള്ള കോഴിക്കോട് കൃഷ്ണമേനോന്‍ മ്യൂസിയത്തിലും ആര്‍ട്ട് ഗാലറിയിലും ഈ ഓണത്തിന് സന്ദര്‍ശകര്‍ കുറവായിരുന്നു. പ്രളയത്തെ തുടര്‍ന്ന് സംസ്ഥാനത്തെ പ്രധാന വിനോദ സഞ്ചാര കേന്ദ്രങ്ങളിലേക്കുള്ള യാത്ര തടസപ്പെട്ടതിനാല്‍ അന്യസംസ്ഥാനക്കാരും തദ്ദേശിയരുമൊക്കെ ഈ ഓണത്തിന് തലസ്ഥാന ജില്ലയിലെ വിനോദ സഞ്ചാര കേന്ദ്രങ്ങളിലേക്കാണ് എത്തിയത്.