തിരുവനന്തപുരം: സിറ്റി പൊലിസ് നടത്തിയ 'ഓപ്പറേഷന്‍ റോമിയോയില്‍' 89 പൂവാലന്മാരെ അറസ്റ്റ് ചെയ്തു. നഗരത്തിലെ സ്‌കൂള്‍, കോളജ്, പരിസരങ്ങളില്‍ പെണ്‍കുട്ടികളെ ശല്യം ചെയ്തവരാണു പിടിയിലായത്. തിരക്കുള്ള സമയങ്ങളില്‍ വിദ്യാലയങ്ങളുടെ സമീപത്തും ബസ് സ്റ്റോപ്പുകളിലും പൂവാലശല്യം രൂക്ഷമാണെന്നുള്ള വിവിധ പരാതികളുടെ അടിസ്ഥാനത്തില്‍ സിറ്റി പൊലിസ് കമ്മിഷണറുടെ നിര്‍ദേശ പ്രകാരമാണു നടപടി. ഇവര്‍ക്കെതിരേ കേസ് റജിസ്റ്റര്‍ ചെയ്തു. ഇക്കഴിഞ്ഞ ബുധന്‍, വ്യാഴം ദിവസങ്ങളിലായിരുന്നു പൊലിസ് 'ഓപ്പറേഷന്‍ റോമിയോ' നടത്തിയത്.
വേഷം മാറി നിന്ന് പെണ്‍കുട്ടികളെ ശല്യം ചെയ്തവരെ കയ്യോടെ പിടികൂടുകയായിരുന്നു പൊലിസ്. വിമന്‍സ് കോളജും, കോട്ടണ്‍ഹില്‍, ഹോളിഏഞ്ചല്‍സ് ഉള്‍പ്പെടുന്ന മ്യൂസിയം പൊലിസ് സ്റ്റേഷന്‍ പരിധിയില്‍ നിന്നാണ് ഏറ്റവും കൂടുതല്‍ പേര്‍ കുടുങ്ങിയത്. ഇവിടെ നിന്ന് രണ്ടു ദിവസങ്ങളിലായി 10 പേര്‍ അറസ്റ്റിലായി.
മെഡിക്കല്‍ കോളജ്, നേമം സ്റ്റേഷന്‍ പരിധിയില്‍ നിന്നും 8 പേര്‍ വീതം പിടിയിലായി. വിഴിഞ്ഞം പൊലിസ് സ്റ്റേഷന്‍ പരിധിയില്‍ നിന്നും ഏഴ് പൂവാലന്മാരെ അറസ്റ്റു ചെയ്തു. ശ്രീകാര്യം പൊലിസ് 6 പേരെ പിടികൂടിയതായും സിറ്റി പൊലിസ് കമ്മീഷണര്‍ പി. പ്രകാശ് അറിയിച്ചു.
വനിത പൊലിസ് സ്റ്റേഷനിലെ വനിതാ പൊലിസുകാര്‍ ഉള്‍പ്പടെയുള്ളവര്‍ വേഷം മാറിയാണ് ഓപ്പറേഷന്‍ റോമിയോയില്‍ പങ്കെടുത്തത്. വരും ദിവസങ്ങളിലും ഇത്തരത്തിലുള്ള ഓപ്പറേഷന്‍ നടത്തുമെന്ന് കമ്മിഷണര്‍ അറിയിച്ചു. ഡെപ്പ്യൂട്ടി കമ്മിഷണര്‍ ആര്‍. ആദിത്യ, സബ് ഡിവിഷന്‍ എ.സിമാര്‍, സി.ഐമാര്‍, എസ്.ഐമാര്‍ നേതൃത്വം നല്‍കി.