ന്യൂഡല്‍ഹി: കേന്ദ്ര സര്‍ക്കാരിന്റെ മൂന്ന് കാര്‍ഷിക നിയമങ്ങള്‍ക്കെതിരേ ഭാരതീയ കിസാന്‍ യൂനിയന്‍ സുപ്രിംകോടതിയെ സമീപിച്ചു. നിയമത്തിനെതിരേ ഡി.എം.കെ നേതാവ് തിരുച്ചി ശിവ സമര്‍പ്പിച്ച ഹരജിയില്‍ ഇടപെടല്‍ ഹരജിയായാണ് യൂനിയന്‍ പ്രസിഡന്റ് ഭാനു പ്രതാപ് സിങ് സുപ്രിംകോടതിയിലെത്തിയത്. നിയമം കാര്‍ഷിക മേഖലയിലെ കോര്‍പറേറ്റ് ആധിപത്യത്തിന് വഴിയൊരുക്കുമെന്നും കര്‍ഷകരെ അടിമകളാക്കുമെന്നും ചൂണ്ടിക്കാട്ടിയാണ് ഹരജി. 

നിയന്ത്രണങ്ങളില്ലാതെ കോര്‍പറേറ്റുകള്‍ക്ക് ഭക്ഷ്യവസ്തുക്കള്‍ ശേഖരിക്കാനും സൂക്ഷിച്ചുവയ്ക്കാനും അനുമതി നല്‍കുന്നത് കാര്‍ഷിക മേഖലയെയും കര്‍ഷകനെയും തകര്‍ക്കും. നിയമവിരുദ്ധവും ഏകപക്ഷീയവുമായാണ് നിയമം പാസാക്കിയത്. ഇതോടെ കാര്‍ഷിക മേഖല കോര്‍പറേറ്റ് പിടിയിലാകും. കര്‍ഷകര്‍ അത്യാര്‍ത്തിയുള്ള കോര്‍പറേറ്റുകളുടെ ദയക്ക് കാത്തുനില്‍ക്കേണ്ട സാഹചര്യമുണ്ടാകും. ബന്ധപ്പെട്ടവരുമായി ചര്‍ച്ച ചെയ്യാതെ ധൃതിപിടിച്ചാണ് നിയമം പാസാക്കിയത്. പ്രകൃതി ദുരന്തത്തിലും മറ്റും കഷ്ടത്തിലായ കര്‍ഷകരെ നിയമം കൂടുതല്‍ പ്രയാസത്തിലാക്കുമെന്നും ഹരജി പറയുന്നു.