മുംബൈ: ഐ.എസ്.എല്‍ അഞ്ചാം സീസണിലെ നാലാം മത്സരത്തില്‍ ഇന്ന് ജംഷഡ്പൂര്‍ എഫ്.സിയും മംബൈ സിറ്റി എഫ്.സിയും തമ്മില്‍ ഏറ്റുമുട്ടും. രാത്രി 7.30ന് മുംബൈ സിറ്റി എഫ്.സിയുടെ ഹോംഗ്രൗണ്ടായ മുംബൈ ഫുട്‌ബോള്‍ അരീനയിലാണ് മത്സരം. കഴിഞ്ഞ സീസണില്‍ കോപ്പലിന് കീഴില്‍ അഞ്ചാം സ്ഥാനക്കാരായ ജംഷഡ്പൂര്‍ ഈ സീസണില്‍ പുതിയ കോച്ച് സെസാര്‍ ഫെറാന്‍ഡോക്ക് കീഴിലാണ് എത്തുന്നത്.
ആസ്‌ത്രേലിയയുടെ സൂപ്പര്‍ താരം ടിം കാഹിലിലാണ് ജംഷഡ്പൂരിന്റെ പ്രതീക്ഷ. മുന്‍പ് എവര്‍ട്ടണ് വേണ്ടിയും മെല്‍ബോണ്‍ എഫ്.സിക്ക് വേണ്ടിയും ബൂട്ടണിഞ്ഞ താരമാണ് കാഹില്‍.
ആസ്‌ത്രേലിയക്ക് വേണ്ടി 107 മത്സരങ്ങളില്‍ നിന്ന് 50 ഗോളുകള്‍ നേടിയിട്ടുണ്ട്. ടിം കാഹിലിന് പുറമേ വിദേശ താരങ്ങളായ പാബ്ലോ മോര്‍ഗാഡോ, തിരി, മെമോ, കാര്‍ലോസ് കാല്‍വോ, മരിയോ ആര്‍ഗസ് എന്നിവരും ജംഷഡ്പൂരിന് ശക്തിപകരുന്നു. സുബ്രതാ പോളാണ് ജംഷഡ്പൂരിന്റെ ഗോള്‍കീപ്പര്‍.
കഴിഞ്ഞ സീസണില്‍ മികച്ച പ്രകടനം നടത്താന്‍ കഴിയാതെ പോയ ടീമാണ് മുംബൈ സിറ്റി എഫ്.സി. പുതിയ കോച്ച് ജോര്‍ജെ കോസ്റ്റക്ക് കീഴില്‍ ഈ സീസണില്‍ അടിമുടി മാറ്റങ്ങളുമായാണ് മുംബൈ കളത്തിലിറങ്ങുന്നത്. ബ്രസീല്‍ താരം റാഫേല്‍ ബാസ്റ്റോസ്, റൊമോനിയന്‍ താരം ലൂസിയാന്‍ ഗോയന്‍, ഉറുഗ്വെ താരം മറ്റിയാസ് മിറാബ്ജി എന്നിവരിലാണ് മുംബൈയുടെ പ്രതീക്ഷ.ഇന്ത്യന്‍ താരങ്ങളായ മിലാന്‍ സിങ്, മുഹമ്മദ് റഫീഖ്, സഞ്ജു പ്രഥാന്‍, സൗവിക് ചക്രബര്‍ത്തി എന്നിവരും മുംബൈക്ക് കരുത്തേകുന്നു.
അമരീന്ദര്‍ സിങാണ് ഗോള്‍കീപ്പര്‍. കഴിഞ്ഞ സീസണില്‍ ഇരു ടീമുകളും ഏറ്റുമുട്ടിയപ്പോള്‍ ഒന്നില്‍ ജംഷഡ്പൂര്‍ വിജയിച്ചു. മറ്റു മത്സരത്തില്‍ ഇരുടീമുകലും രണ്ട് ഗോള്‍ വീതം നേടി സമനിലയില്‍ പിരിഞ്ഞു.