വടകര: തദ്ദേശ തെരഞ്ഞെടുപ്പില്‍ യു.ഡി.എഫ് റെക്കോര്‍ഡ് വിജയം നേടുമെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. പിണറായി വിജയന്‍ സി.പി.എമ്മിന്റെ ശേഷക്രിയ നടത്തുന്ന അവസാനത്തെ മുഖ്യമന്ത്രിയാവും.
അവസര വാദത്തിന്റെ അപ്പോസ്തലനാണ് മുഖ്യമന്ത്രിയെന്നും അദ്ദേഹം പറഞ്ഞു. മുക്കാളി ചോമ്പാല എല്‍.പി.സ്‌കൂളില്‍ കുടുംബാംഗങ്ങളോടൊപ്പം വോട്ട് രേഖപ്പെടുത്തിയശേഷം മാധ്യമങ്ങളോട് സംസാരിക്കുകയായിരുന്നു മുല്ലപ്പളളി. നാലരവര്‍ഷം ജനങ്ങളില്‍ ദുരിതങ്ങളും നിരാശയും ഉണ്ടാക്കിയ ഭരണം എല്‍.ഡി.എഫിന്റെ അവസാന ഭരണമായിരിക്കും. കൊവിഡ് മഹാമാരിയില്‍ ഏറ്റവും കൂടുതല്‍ മരണം സമ്മാനിച്ച് പൊങ്ങച്ചങ്ങള്‍ പറയുന്ന മുഖ്യമന്ത്രിയുടെ വാക്‌സിന്‍ വിതരണം സൗജന്യമാക്കും എന്ന പ്രസ്താവന തെരഞ്ഞെടുപ്പ് ചട്ട ലംഘനമാണെന്നും അദ്ദേഹം ആരോപിച്ചു.