ഇരിട്ടി: യൂത്ത് കോണ്‍ഗ്രസ് പേരാവൂര്‍ നിയോജക മണ്ഡലം സെക്രട്ടറി പായം വട്ട്യറ കരിയാലിലെ ജിജോ പുളിയാനിക്കാട്ടിനെ (38) വെട്ടിപ്പരുക്കേല്‍പ്പിച്ച സംഭവത്തില്‍ രണ്ടു സി.പി.എം പ്രവര്‍ത്തകരെ കൂടി പൊലിസ് അറസ്റ്റുചെയ്തു. വട്ട്യറ കരിയാലിലെ എം.കെ ഷിജു (38), പി. ധനേഷ് (36) എന്നിവരെയാണു സി.ഐ രാജീവന്‍ വലിയവളപ്പില്‍ പിടികൂടിയത്. വട്ട്യറ എരുമത്തടത്തിലെ ജയചന്ദ്രനെ (34) കഴിഞ്ഞദിവസം അറസ്റ്റുചെയ്തിരുന്നു.
കേസില്‍ ഒരാളെ കൂടി പിടികൂടാനുണ്ട്. കഴിഞ്ഞ 19നു രാത്രി വട്ട്യറ കരിയാലിലില്‍ കോണ്‍ക്രീറ്റ് തൊഴില്‍ ജോലിക്കിടെ കാറിലെത്തിയ മുഖംമൂടി സംഘമാണ് ജിജോയെ ആക്രമിച്ചത്. കരിയാലില്‍ മരണ വീട്ടില്‍ മൃതദേഹത്തില്‍ റീത്തുവച്ചത് എടുത്ത് മാറ്റിയതുമായി ബന്ധപ്പെട്ട വാക്കുതര്‍ക്കമാണ് അക്രമത്തില്‍ കലാശിച്ചതെന്നു പൊലിസ് പറഞ്ഞു.