കാഞ്ഞങ്ങാട്: മതപരമായ വിഷയങ്ങളില്‍ പ്രമാണത്തിന്റെ പിന്‍ബലമില്ലാതെ സ്വന്തം അഭിപ്രായങ്ങളും വീക്ഷണവും അവതരിപ്പിച്ചുകൊണ്ട് വിശ്വാസികള്‍ക്കിടയില്‍ തെറ്റിദ്ധാരണ പരത്തുന്ന എം.ഇ.എസ് പ്രസിഡന്റ് ഡോ.ഫസല്‍ ഗഫൂറിന്റെ നിലപാടില്‍ പ്രതിഷേധിച്ച് എം.ഇ.എസ് കാസര്‍കോട് ജില്ലാ കമ്മിറ്റി ജന. സെക്രട്ടറി സി. മുഹമ്മദ് കുഞ്ഞി, ട്രഷറര്‍ എ. ഹമീദ് ഹാജി എന്നിവര്‍ തല്‍സ്ഥാനം രാജിവച്ചു.
മതപരമായ വിഷയങ്ങള്‍ കൈകാര്യം ചെയ്യാന്‍ ഇവിടെ പണ്ഡിതന്മാരുണ്ട്. അവരാണ് ശരീഅത്ത്‌പോലുള്ള കാര്യങ്ങളില്‍ അഭിപ്രായം പറയാന്‍ ആധികാരികമായി അര്‍ഹതയുള്ളവര്‍. എന്നാല്‍ വിദ്യാഭ്യാസ മേഖലയില്‍ മാത്രം ശ്രദ്ധ കേന്ദ്രീകരിച്ച് പ്രവര്‍ത്തിക്കുന്ന എം.ഇ.എസ് അത്തരം വിഷയങ്ങളില്‍ അഭിപ്രായം പറഞ്ഞ് വിവാദമുണ്ടാക്കുന്നത് മത പണ്ഡിതന്മാരെക്കുറിച്ച് അവമതിപ്പുണ്ടാക്കുവാന്‍ മാത്രമേ ഉപകരിക്കുകയുള്ളൂവെന്നും ഇരുവരും വ്യക്തമാക്കി.