സര്‍വിസുകള്‍ ശനിയാഴ്ച സമാപിക്കും
കൊണ്ടോട്ടി: അനിശ്ചിതത്വങ്ങള്‍ക്കൊടുവില്‍ ഹജ്ജ് കഴിഞ്ഞ് മടങ്ങിയെത്തുന്ന ഹാജിമാര്‍ക്ക് നല്‍കാനുള്ള സംസം ജലം കരിപ്പൂരിലെത്തി. മൂന്ന് ദിവസങ്ങളിലായി 10,000 പേര്‍ക്കുളള സംസം ജലമാണ് സഊദി എയര്‍ലൈന്‍സ് എത്തിച്ചത്. ശേഷിക്കുന്നവ അടുത്ത ദിവസങ്ങളില്‍ എത്തിക്കും. ഓരോ ഹാജിക്കും അഞ്ച് ലിറ്റര്‍ സംസമാണ് മടങ്ങിയെത്തുമ്പോള്‍ നല്‍കുക. വിമാന കമ്പനി എത്തിച്ച സംസം കരിപ്പൂര്‍ വിമാനത്താവളത്തിലാണ് സൂക്ഷിച്ചിരിക്കുന്നത്. ഹാജിമാര്‍ മടങ്ങിയെത്തുമ്പോള്‍ കസ്റ്റംസ് എമിഗ്രേഷന്‍ പരിശോധനകള്‍ പൂര്‍ത്തിയാക്കി പുറത്തേക്കിറങ്ങുമ്പോഴാണ് സംസം കൈമാറുക.
ഹാജിമാര്‍ മടങ്ങിയെത്തുന്ന വിമാനങ്ങളില്‍ സംസവും ലഗേജും ഒരുമിച്ച് കൊണ്ടുവരുന്നത് ഒഴിവാക്കാനാണ് സംസം നേരത്തെ എത്തിക്കുന്നത്.അതിനിടെ കരിപ്പൂരില്‍ നിന്നുള്ള ഹജ്ജ് വിമാന സര്‍വിസുകള്‍ ശനിയാഴ്ച സമാപിക്കും. ഇന്നലെ മൂന്ന് വിമാനങ്ങളിലായി 900 പേര്‍ യാത്രയായി. ഇന്ന് രണ്ട് വിമാനങ്ങളില്‍ 600 തീര്‍ഥാടകര്‍ പുറപ്പെടും. 18ന് ഒരു വിമാനവും 19ന് രണ്ടും 20ന് നാല് വിമാനങ്ങളും സര്‍വിസ് നടത്തും.