ന്യൂഡല്‍ഹി: വിജയ് ഹസാരെ ട്രോഫി ക്രിക്കറ്റില്‍ കേരളത്തിന് വീണ്ടും തോല്‍വി. ആദ്യ മത്സരത്തില്‍ കേരളം ഡല്‍ഹിക്കെതിരേ നാണം കെട്ട തോല്‍വി ഏറ്റുവാങ്ങിയിരുന്നു. ഇതിന്റെ ഓര്‍മ മായും മുമ്പെയാണ് രണ്ടാം തോല്‍വി. കഴിഞ്ഞ ദിവസം സമാപിച്ച മത്സരത്തില്‍ കേരളം ഹൈദരാബാദിനോട് ഏഴു വിക്കറ്റിന് പരാജയപ്പെട്ടു. ആദ്യം ബാറ്റ് ചെയ്യാന്‍ തീരുമാനിച്ച കേരളത്തിനു 50 ഓവറില്‍ നിന്ന് 189ന് 6 എന്ന സ്‌കോര്‍ മാത്രമേ നേടാനായുള്ളു. 62 റണ്‍സ് നേടിയ വി.എ ജഗദീഷ് ടോപ് സ്‌കോറര്‍ ആയപ്പോള്‍ വിഷ്ണു വിനോദ് 34 റണ്‍സുമായി പുറത്താകാതെ നിന്നു. സച്ചിന്‍ ബേബി 31 റണ്‍സ് നേടി.
മറുപടി ബാറ്റിങിനായി ഇറങ്ങിയ ഹൈദരാബാദ് രോഹിത് റായിഡു(57), ബി. സന്ദീപ്(48) എന്നിവര്‍ക്കൊപ്പം ആശിഷ് റെഡ്ഢി(37), അക്ഷത് റെഡ്ഢി(39) എന്നിവരുടെ ബാറ്റിങ് കൂടി ചേര്‍ന്നപ്പോള്‍ മൂന്ന് വിക്കറ്റ് നഷ്ടത്തില്‍ 46.4 ഓവറില്‍ 190 റണ്‍സ് നേടി വിജയം സ്വന്തമാക്കി.
കേരളത്തിനായി ജലജ് സക്‌സേന രണ്ട് വിക്കറ്റ് നേടി. 10 ഓവറില്‍ 22 റണ്‍സാണ് താരം വഴങ്ങിയത്. നാലാം വിക്കറ്റ് കൂട്ടുകെട്ടാണ് ഹൈദരാബാദിനെ വിജയത്തിലെത്തിച്ചത്.