ജക്കാര്‍ത്ത: ഇന്തോനേഷ്യയില്‍ നടക്കുന്ന മൂന്നാമത് പാരാ ഏഷ്യന്‍ ഗെയിംസില്‍ റിയോ പാരാലിംപിക്‌സില്‍ ഇന്ത്യക്കായി മെഡല്‍ നേടിയ തങ്കവേലു മാരിയപ്പര്‍ പതാക വാഹകനാകും. 2016ല്‍ റിയോയില്‍ നടന്ന ഒളിംപിക്‌സില്‍ ഹൈജംപിലായിരുന്നു മാരിയപ്പന്‍ ഇന്ത്യക്കായി സ്വര്‍ണമെഡല്‍ നേടിയത്.
ഈ മാസം ആറുമുതല്‍ 13 വരെയാണ് മീറ്റ് നടക്കുന്നത്. താരങ്ങളും കോച്ചുമാരും മറ്റു സ്റ്റാഫുകളുമുള്‍പ്പെടെ 302 പേരടങ്ങുന്ന സംഘമാണ് ഇന്ത്യയെ പ്രതിനിധീകരിച്ച് ജക്കാര്‍ത്തയിലെത്തുന്നത്. താരങ്ങളും അത്‌ലറ്റുകളും നേരത്തെ ഗെയിംസ് വില്ലേജിലെത്തിയെങ്കിലും കായിക മന്ത്രാലയം ഗെയിംസ് വില്ലേജില്‍ പണമടക്കാത്തതിന്റെ പേരില്‍ പ്രവേശനം തടഞ്ഞു. പിന്നീട് 1,83,00,000 രൂപ അടച്ചതിന് ശേഷമാണ് താരങ്ങളെ ഗെയിംസ് വില്ലേജില്‍ പ്രവേശിപ്പിച്ചത്.