ചാവക്കാട്: എടക്കഴിയൂരില്‍ വട്ടിപ്പലിശക്കാരന്റെ വീട് കയറിയുള്ള ആക്രമണത്തില്‍ വയോധികയായ മാതാവിനും മകനും പരുക്ക്. എടക്കഴിയൂര്‍ തെക്കേമദ്‌റസ കുന്നത്ത് ഫാത്തിമുത്തു(62), മകന്‍ ജബ്ബാര്‍(34) എന്നിവര്‍ക്കാണ് പരുക്കേറ്റത്. ഇരുവരും ചാവക്കാട് താലൂക്കാശുപത്രിയില്‍ ചികിത്സയിലാണ്.
 ചാവക്കാട് മേഖലയിലെ പ്രധാന വട്ടിപ്പലിശക്കാരിലൊരാളായ  തിരുവത്ര പുതിയറ സ്വദേശിയാണ് ഇവരെ ആക്രമിച്ചത്. വെള്ളിയാഴ്ച്ച രാത്രി പതിനൊന്നോടെയാണ് ആക്രമണം. ആക്രമണത്തില്‍ ജബ്ബാറിന്റെ ഇടതുകാലിന്റെ എല്ല് തകര്‍ന്നിട്ടുണ്ട്. ഫാത്തിമുത്തുവിന് പുറത്തും കവിളത്തുമാണ് മര്‍ദനമേറ്റത്.മുതുവട്ടരില്‍ ഹോട്ടല്‍ ജിവനക്കാരനായ ജബ്ബാര്‍ വട്ടിപ്പലിശക്കാരനായ യുവാവില്‍നിന്ന് 25000 രൂപ കടമെടുത്തിരുന്നു. ദിവസന്തോറും അടച്ചു തീര്‍ക്കാമെന്ന വ്യവസ്ഥയിലായിരുന്നു കടം വാങ്ങിയത്. രണ്ടുമാസമായി മുതുവട്ടൂരിലെ ഹോട്ടലിലെത്തിയാണ്  യുവാവ് പണം പിരിച്ചിരുന്നത്.
 കഴിഞ്ഞ ദിവസം 45000 രൂപ തനിക്ക് ഇനി തരാനുണ്ടെന്നും ഇത് മുഴുവന്‍  ഒരുമിച്ച് തരണമെന്നും ആവശ്യപ്പെട്ട് യുവാവ്  എത്തിയിരുന്നു. എന്നാല്‍ താന്‍ കുറെ പണം നല്‍കിയെന്നും ഇനി ഇത്രയും വലിയ സംഖ്യ തരാനില്ലെന്നും ജബ്ബാര്‍ അറിയിച്ചു.
 ഇതോടെയാണ് ക്ഷുഭിതനായ യുവാവ് നിന്നെ വീട്ടില്‍ പൊറുപ്പിക്കെല്ലെന്നും വെല്ലുവിളിച്ച് പോയത്. ഇതിന് ശേഷം രാത്രി പതിനൊന്നിന് ജബ്ബാറിന്റെ വീട്ടിലെത്തിയാണ് യുവാവ് ആക്രമിച്ചത്. മകനെ  ആക്രമിക്കുന്നത് കണ്ട് ഓടിയെത്തിയ ഉമ്മ ഫാത്തിമുത്തുവനെ പലിശക്കാരനായ യുവാവ് അടിച്ചു നിലത്തിട്ടു. ചാവക്കാട് പൊലിസ് കേസെടുത്തിട്ടുണ്ട്.