കൊച്ചി: ജലന്ധര്‍ മുന്‍ ബിഷപ്പ് ഫ്രാങ്കോ മുളയ്ക്കലിന്റെ ജാമ്യാപേക്ഷ ഹൈക്കോടതി തള്ളി. ബിഷപ്പ് സഭയുടെ ഉന്നത സ്ഥാനത്തിരിക്കുന്നയാളാണെന്നും സാക്ഷികളെ സ്വാധീനിക്കാനിടയാകുമെന്നും ചൂണ്ടിക്കാട്ടി ജാമ്യാപേക്ഷ തള്ളുകയായിരുന്നു.
ആരോപണങ്ങള്‍ ഗൗരവമുള്ളതാണെന്നും ബിഷപ്പിനെതിരേ പ്രഥമദൃഷ്ട്യാ തെളിവുണ്ടെന്നും കോടതി വ്യക്തമാക്കി. കേസ് കെട്ടിച്ചമച്ചതാണെന്ന വാദം അംഗീകരിക്കാനാവില്ലെന്നു കോടതി ചൂണ്ടിക്കാട്ടി. കന്യാസ്ത്രീയുടെ രഹസ്യമൊഴി ഹരജിക്കാരനെതിരാണെന്നും പീഡന കേസുകളില്‍ മറ്റു വശങ്ങള്‍ പരിഗണിക്കേണ്ടതില്ലെന്നും ഉത്തരവില്‍ പറയുന്നു.
അന്വേഷണം പുരോഗമിക്കുന്ന സാഹചര്യത്തില്‍ ജാമ്യം അനുവദിക്കരുതെന്ന പ്രോസിക്യൂഷന്‍ വാദം കോടതി അംഗീകരിക്കുകയായിരുന്നു.
ജാമ്യം നല്‍കിയാല്‍ കേസ് അട്ടിമറിക്കാനിടയാകുമെന്നും പ്രോസിക്യൂഷന്‍ വാദിച്ചു. കേസ് ഡയറിയും മൊഴിപ്പകര്‍പ്പുകളും അന്വേഷണ പുരോഗതി റിപ്പോര്‍ട്ടും സര്‍ക്കാര്‍ കോടതിയില്‍ ഹാജരാക്കി. സര്‍ക്കാരിനുവേണ്ടി ഡി.ജി.പി സി.ശ്രീധരന്‍ നായര്‍ ഹാജരായി.